Professional futbol klublarimizdagi noprofessionallik yoxud Superliga jamoalarining matbuot xizmatidagi ahvol qanday?

So‘nggi paytlarda O‘zbekiston Superligasi darajasi ancha o‘sib bormoqda. Yildan-yilga chempionatimizda intriga oshib, chempionlik uchun kurash keskin ko‘rinish olmoqda. Ammo, futbolimiz hamon kichik kamchiliklardan holi emasdek, go‘yo. Aniqroq aytadigan bo‘lsak, klublarimizning matbuot xizmati professional darajada ishlamayapti.

Yaqinda Jizzaxning “So‘g‘diyona” klubiga oid ma’lumot kerak bo‘lib qoldi. Shu bois, klub rasmiy saytiga (fcsogdiana.uz) kirdim . Ammo o‘zim kutgan natija bo‘lmadi. Chunki jamoaning rasmiy sayti nofaol holatda ekan.

Bu holat meni biroz hayron qoldirdi. Sababi, Osiyo darajasidagi musobaqada qatnashadigan klub uchun bu biroz uyatlidek, chamamizda. Haqiqatdan ham Osiyoda klublar darajasidagi ikkinchi musobaqada qatnashadigan jamoaning ijtimoiy tarmoqlardagi sahifasi ishlamasligi maqtaladigan holat emas. Tasavvur qiling, jizzaxliklarning qaysidir futbolchisi Evropa yoki Osiyo klublari skauti nazariga tushdi. Istaymizmi yo‘qmi agentlar birinchi navbatda o‘sha futbolchini ijtimoiy tarmoqlar orqali qidiradi. Ehtimol o‘sha agentlar “So‘g‘diyona” rasmiy saytiga kirar, biroq Not Found 404.

Ammo bu yagona muammo emas.

Ba’zida, futbol klublarimizning matbuot xizmatidagi ahvolni ko‘rib achinib ketamiz.

Bizda asosan klub haqidagi xabarlar telegram kanallar orqali e’lon qilinadi, ammo kuzatsam, o‘shani ham tayinli ishlatib qo‘ymaydi! Shunda savol tug‘iladi. Klub matbuot xizmat xodimlarining asosiy ishi nima? Jamoa rahbariyati matbuot xizmati xodimlariga boshqa saytlardan “forward” qilishi uchun oylik berishadimi?!

Shu bois, Osiyo, aniqrog‘i bizning jamoalarga ko‘plab muammo tug‘dirayotgan Saudiya, BAA kabi mamlakatlarning klub matbuot xizmati holatiga nazar soldim. O‘zini hurmat qiladigan barcha jamoalarning sayti,  telegram kanali,  instagram,  feysbuk va tvitter sahifalari ham o‘z tezkorlik bilan ishlaydi. Bizning klublar matbuot xizmati bitta telegram kanalini tuzuk ishlatolmaydi, menimcha.

Shu sabab boshqa klublarimizning ham ijtimoiy tarmoqlardagi sahifalari bilan qiziqib ko‘rdim.

2021 yilgi Osiyo Chempionlar ligasida ishtirok etgan va so‘nggi yillarda Superliga g‘olibligi uchun da’vogarlar qatoridan joy olgan Olmaliqning AGMK klubi bilan ham holat shunday. Vikipediyaga qaraydigan bo‘lsak, “konchilar”ning ham shaxsiy veb-sayti bor (www.fc-agmk.uz), ammo bu ham hozir faol holatda emas (balki, umuman ishlamagan).

Toshkentning “Bunyodkor” klubi sahifasiga nazar soldim. Quvonarli tomoni, “qaldirg‘ochlar”ning (www.fcbunyodkor.com) sayti faol, ammo Superliga turnir jadvali mart oyidan keyin yangilamaganiga guvoh bo‘lasiz.

“Qizilqum”, “Qo‘qon-1912”, “Metallurg”, Olimpik”, “Lokomotiv”, “Neftchi” va “Dinamo” kabi klublarimizda ham shu ahvol kuzatilgan. Ba’zi jamoalarning sayti ishlamaydi, ba’zilarida esa eski yildagi ma’lumotlar o‘zgartirilmagan. Hatto, o‘z safiga ko‘plab evropalik futbolchilarni qo‘shib olayotgan “Surxon” klubining shaxsiy sayti yo‘q (ehtimol topa olmagandirman).

Misol tariqasida, “Qizilqum” rasmiy veb-saytidan (www.fcqizilqum.uz) na’muna keltiramiz.

Ko‘rganingizdek, ikki oy oldingi ma’lumotlar o‘zgartirishsiz qolgan. Bilamizki, Navoiy klubi ancha vaqtdan beri o‘z oldiga katta maqsadlar qo‘yib, yuqori o‘rinlar uchun kurashib kelmoqda. Ayniqsa, joriy mavsum “Qizilqum” etakchi klublar uchun haqiqiy boshog‘riqqa aylandi. Lekin professionallikka intilayotgan klubning rasmiy sahifasi nofaol ko‘rinishda ekanligi achinarli.

Albatta, o‘z vazifasini siddiqidildan bajarayotgan jamoalar ham etarlicha. Bu borada “Navbahor”, “Nasaf” va “Paxtakor” matbuot xizmati xodimlariga rahmat aytish kerak. Ayni paytda Superliga turnir jadvalida kuchli uchlikni band qilib turgan klublarda barchasi professional darajada yo‘lga qo‘yilgan. Qolgan jamoalar ham bundan o‘rnak olsa arziydi, chamamda.

Bu bilan qaysidir jamoani tanqid qilishdan yiroqmiz, lekin PROFESSIONAL futbol klub nomiga mos harakat qilishimiz kerak.

Jamshidbek Mahmudov tayyorladi