ПСЖ - МЮ. Кавани ва жамоа сардори Парижга бормади

"Манчестер Юнайтед" сардори Харри Магуайр ва ҳужумчи Эдинсон Кавани Чемпионлар лигаси гуруҳ босқичининг дастлабки туридан ўрин олган ПСЖга қарши баҳсда иштирок этмайди, деб хабар берди Manchester Evening News нашри.

Манбанинг маълум қилишича, иккала футболчи ҳам Парижга учиб кетаётган МЮ жамоаси таркибида кўринмаган.

Куни кеча Кавани 14 кунлик карантиндан сўнг, "Манчестер Юнайтед"даги биринчи машғулотини ўтказди. Магуайрни "Ньюкасл"га (4:1) қарши учрашувда майдонга тушиши сўроқ остида эди, аммо ҳимоячи беллашувда қатнашди. У ПСЖ жамоаси билан бўлиб ўтадиган ўйинга тайёр эмас, деб қўшимча қилинмоқда.

Шу қаторда, жароҳати сабаб Мэйсон Гринвуд ҳам ЧЛнинг илк баҳсида қатнаша олмаслиги маълум бўлди. "Пеньярол" клубидан трансфер қилинган 18 ёшли ярим ҳимоячи Факундо Пельистри қайдномадан жой олган.

"Манчестер Юнайтед" ПСЖга қарши учрашувни сафарда ўтказади. Беллашув эртага Тошкент вақти билан соат 00:00 да бўлиб ўтади.

Матнда хатолик топсангиз, ўша хатони белгилаб, бизга жўнатинг (Ctrl + Enter)