ПСЖ финалдаги ғалабадан кейин Луис Энрике бўйича муҳим қарорга келди

Франциянинг энг қудратли клуби “Пари Сен-Жермен” раҳбарияти жамоанинг келажагини испаниялик мураббий Луис Энрике билан боғламоқда.

Парижликлар тажрибали мутахассиснинг меҳнат шартномасини яна тўрт йилга узайтиришга қарор қилди.

Бу ҳақда журналист ва инсайдер Бен Жейкобс хабар берди.

Манба маълумотига кўра, Будапештда Чемпионлар лигаси ғолиблигини муваффақиятли ҳимоя қилганидан кейин ПСЖ президенти Носир Ал-Хелаифий Луис Энрикенинг Париждаги ҳаётдан жуда мамнун эканини таъкидлаган.

Шунингдек, клуб раҳбарияти унинг узоқ муддатли лойиҳасига тўлиқ ишонаётганини билдирган.

Томонлар Чемпионлар лигаси финалига қадар барча асосий шартлар бўйича келишиб олган. Шартномани мавсум тугаганидан кейин расмийлаштиришга қарор қилинган.

30 май куни ПСЖ Чемпионлар лигаси финалида Лондоннинг Арсенал клубини мағлуб этди (1:1, пенальтилар сериясида 4:3) ва қаторасига иккинчи бор қитъанинг энг нуфузли мусобақаси бош совринини қўлга киритди.