ПСЖ Ламин Ямал трансфери учун ҳаракатни бошлади

Франциянинг ПСЖ клуби Ламин Ямал атрофидаги вазиятни диққат билан кузатишда давом этмоқда.

Маълум қилинишича, клуб президенти Нассер Ал-Хелаифи машҳур агент Жорже Мендеш билан доимий алоқада бўлиб, футболчининг ҳолати ҳақида маълумот олиб бормоқда.

Ҳозирча аниқ музокаралар ёки трансфер бўйича келишувлар йўқ. Бу кўпроқ узоқ муддатли стратегия сифатида баҳоланмоқда.

Аввалроқ ПСЖ Ямални сотиб олиш учун тахминан 200 миллион евро таклиф қилишга тайёр экани ҳақида хабарлар чиққан эди. Бироқ “Барселона” бу таклифни рад этган.

Шунга қарамасдан, парижликлар футболчини ўз режаларидан чиқармаган ва унинг фаолиятини кузатишда давом этмоқда. Улар келажакда вазият ўзгариши мумкин, деб ҳисобламоқда — бу аввал Неймар ва Лионель Месси трансферларида ҳам кузатилган.

Шу билан бирга, каталонияликларнинг позицияси қатъийлигича қолмоқда. Клуб Ямални “сотилмайдиган” футболчи деб ҳисоблайди ва фақат 1 миллиард евро миқдоридаги товон пули тўланган тақдирдагина уни қўйиб юбориши мумкин.

Қайд этиш жоиз, Ламин Ямал клуб академияси тарбияланувчиси ҳисобланади. У жуда ёш бўлишига қарамасдан, жамоанинг асосий таркибида муҳим ўрин эгаллаб улгурган.

Футболчи 15 ёшидаёқ биринчи жамоада дебют қилган ва клуб тарихидаги энг ёш дебютантлардан бирига айланган. Шунингдек, у Ла Лига ва Европа мусобақаларида ҳам бир қатор рекордларни ўрнатган.

Вингер "кўк-анорранглилар"  билан Испания чемпионати ва Суперкубокни қўлга киритган ҳамда мавсумнинг энг яхши ёш футболчиси деб топилган.