ПСЖ Неймарни трансфер қилишдан қўрқяпти

ПСЖ раҳбарияти катта маош олаётган Неймарнинг трансферини амалга ошира олмаслиги мумкин. Le Parisien нашрининг ёзишича, парижликлар бразилиялик футболчининг жароҳатларга мойил бўлиб қолгани уни бошқа жамоага ўтишига тўсқинлик қилишидан хавотирда.

Клуб спорт директори Луиш Кампуш Неймар жароҳатлари туфайли муҳим учрашувларда жамоага ёрдам бера олмаётгани учун ундан тезроқ қутилмоқчи бўляпти. Қатардаги жаҳон чемпионатида орттирилган жароҳат Неймарнинг келажагига салбий таъсир қилмоқда.

ПСЖ бор эътиборини Килиан Мбаппе атрофида янги лойиҳа шакллантиришга қарор қилди. Шунга қарамай, клуб ёзда Неймардан қутила олмаслигини билади.

Чунки ҳеч бир клуб катта маош талаб қиладиган, лекин кўп жароҳат оладиган ўйинчини трансфер қилишга кўнмайди. Неймарнинг янги жамоа тиббий кўригидан ўтолмаслик эҳтимоли катта.