“Қайрат” “Реал Мадрид” собиқ ҳужумчисини ўз сафига қўшиб олди

 "Қайрат" клуби испаниялик ҳужумчи Марк Гуаль билан шартнома имзолаганини эълон қилди, дея хабар берди клуб матбуот хизмати.

"Қайрат“ испаниялик марказий ҳужумчи Марк Гуаль билан шартнома имзолаганини маълум қилади. Келишув 2027 йилнинг охиригача мўлжалланган.

— Ёши: 30 ёш
— Амплуаси: марказий ҳужумчи
— Бўйи: 184 см
— Вазни: 73 кг

Марк Гуаль Каталониянинг Бадалона шаҳрида туғилган. У "Бадалона", "Барселона" ва "Эспаньол" клублари академиясида тарбия топган. Катта футболда эса "Севилья Атлетико", "Сарагоса", "Жирона", "Реал Мадрид Кастилья" ва "Алькоркон" жамоалари шарафини ҳимоя қилган.

2022 йил баҳорида Гуаль Польша чемпионатида иштирок этувчи "Ягеллония" клубига ўтди. 2022/23 йилги мавсум якунларига кўра у Польша чемпионатида энг кўп гол урган футболчига айланди ва Экстраклассанинг энг яхши ҳужумчиси сифатида эътироф этилди. 2023 йил ёзида испаниялик футболчи Варшаванинг "Легия" клуби аъзоси бўлди. Ушбу жамоа сафида Суперкубок ва Польша Кубогини қўлга киритди. 2024/25 йилги мавсумда Марк клубнинг энг самарали ўйинчисига айланиб, барча мусобақаларда жами 19 та гол урди, шу жумладан УЕФА Конференциялар Лигасида 7 та тўп киритди.

Ҳужумчининг сўнгги жамоаси Португалия чемпионатининг олий дивизионида иштирок этувчи "Риу Аве" клуби бўлган.

Шунингдек, Гуаль Испаниянинг 21 ёшгача бўлган ёшлар терма жамоаси сафида учта ўйин ўтказгани қайд этилган", — дея маълум қилинган клубнинг инстаграм саҳифасида.