Қиличбозлик. Бугунги кун вакилларимиз учун медалсиз якунланди

Миср пойтахти Қоҳира шаҳри қиличбозлик бўйича Жаҳон чемпионатига мезбонлик қилмоқда.

Бугун икки спортчимиз баҳсларда иштирок этиши ҳақида хабар бергандик. Афсуски, шпага йўналишида Севара Раҳимова 1/32 финал босқичида жаҳоннинг 5-рақамли спортчисига имкониятни бой берди, 7:15.

Сабля йўналишида юртимиз шарафини ҳимоя қилган Муса Аймуратов илк босқичда Украина вакили Васил Хумен устидан 15:13 ҳисобида ғалаба қозонди. Аммо италиялик тажрибали спортчи, Токио Олимпиадаси финалчиси Лука Куратоли Аймуратовни 1/16 финалда тўхтатди. Якуний ҳисоб - 6:15, Куратоли фойдасига.

Эртага 3 нафар вакилимиз медаллар учун баҳсга киришади.