"Қизилқум" "Факел" билан 3:3 ўйнагач, навоийликлар устози нима деди?

Суперлигани бошқа клублари қаторида Навоийнинг “Қизилқум” жамоаси ҳам янги мавсум учун тайёргарликни Туркиянинг Анталия шаҳрида олиб бормоқда.

Ҳозирга қадар “Қизилқум” Анталияда иккита назорат учрашувини ўтказди.

Дастлабки ўйин Россиянинг “Спартак-2” клубига қарши бўлиб ўтди ва унда навоийларнинг 3:1 ҳисобида қўли баланд келди.

Бугун эса иккинчи ўртоқлик баҳси ташкил қилинди. Бу сафар ҳам “Қизилқум”га Россия жамоаси тўқнаш келди.

“Факел”га қарши беллашув ҳам голларга бой ўтди. “Қизилқум” яна учта гол урди, аммо шу билан бирга ўз дарвозасидан учта тўп олиб чиқди, натижа эса 3:3. Эътиборлиси, “Қизилқум”дан Ислом Кенжабоев хет-трикка эришди.

Ҳозирча “Қизилқум”ни ҳисобида иккита ўйиндан кейин бир дуранг ва бир ғалаба мавжуд. Рақиблар эса жиддий эди ва Россия клубларига қарши иккала баҳсда ҳам учтадан гол уриши албатта “Қизилқум” учун ижобий ҳолат.

Клуб матбуот хизмати “Факел”га қарши ўйиндан сўнг “Қизилқум” устози Акмал Рустамовнинг фикрлари билан қизиқиб кўрди. 

- Охирги йиғинимизни Туркиянинг Анталия шаҳрида ўтказяпмиз. Бугун иккинчи ўртоқлик учрашувини ўтказдик. Ҳозир барча йигитларни синаб кўряпмиз. Яна ҳали тўртта ўйинимиз бор. Шу учрашувларни ўтказиб таркибимизни аниқлаб оламиз. Ўйлайманки, тайёргарлигимиз ёмон бўлмаяпти. Худо хоҳласа, чемпионатга яхши тайёргарлик олиб боряпмиз. Насиб бўлса, мавсумга тайёр ҳолатда етиб борамиз.

- Ушбу мавсумда жамоангизда сизнингча қайси футболчи кашфиёт бўла олади, деб ўйлайсиз?

- Кашфиёт бўладиган футболчиларимиз бор, фақат ҳаракат қилишлари керак. Ўзларини устида кўпроқ ишласалар, ўзини кўрсатишга ҳамма футболчида имконият бўлади. Футбол жамоавий ўйин бўлгани учун жамоа ҳаракат қилса орасидан кашфиётлар ҳам чиқаверади.