“Қизилқум” клуби кеча Суперлиганинг 6-тур қолдирилган ўйини доирасида Олмалиқда АГМКга қарши майдонга тушди. Қизиқарли кечган учрашувда навоийликлар сафарда 1:2 ҳисобида ғалаба қозониб, муҳим ғалабани қўлга киритди.

Эътиборлиси, АГМКнинг собиқ футболчилари – Элгужа Григалашвили ҳамда Эркин Бойдуллаевнинг голлари “Қизилқум”га ғалаба келтирди. Грузиялик Григалашвили ўйиннинг энг яхши футболчиси бўлди.

У бундай эътирофга ҳақли эди. Учрашувни кузатган бўлсангиз, шу куни ушбу легионер майдонда жуда фаол бўлди. Қуйида унинг мазкур беллашувдан кейин sports.uz мухбирига берган интервьюсини ўқишингиз мумкин.

- АГМКга қарши энг яхши ўйинчи бўлдингиз. Айтинг-чи, собиқ клубингизга қарши беллашувда нималарга қодирлигингизни исботлаб бериш асосий мақсадингизмиди?

- Мен ҳеч қачон бирор кимсага ниманидир исботлашга ҳаракат қилмайман. Худога шукрки, яхши жамоага қарши беллашувни ўз фойдамизга ҳал қилиб, мухлисларимиз қаршисида юзимиз ёруғ бўлди. Мен жамоадошларимга қўлимдан келганча ёрдам беришга ҳаракат қилдим, киритган голим орқали клубимнинг ғалабасига ҳисса қўшганимдан хурсандман.

гужа1_1

- Умуман айтганда, ўйин сизда қандай таассурот қолдирди?

- Ўйин жуда оғир бўлди. Мен шундай бўлишини олдиндан сезгандим. Чунки собиқ клубим сафида бир ярим йил тўп сурганман. АГМКнинг қандай кучга эга эканлигидан бохарбаман. Шуни биламанки, улар кучли, айниқса, уй ўйинларида. Бу клубни меҳмонда доғда қолдириш жуда машаққатли ишдир. Бизнинг жамоа рақибга нисбатан яхши ўйин намойиш этди. Бу бутун клубимиз аъзоларининг саъй-ҳаракатлари самарасидир.

- АГМК дарвозабонининг хатоси сизни ҳайрон қолдирдими?

- Йўқ, бундай фикрга қўшилмайман. Чунки манаман деган энг яхши дарвозабон ҳам ўйинлар чоғида хатога йўл қўяди. Дарвозабон жамоага жуда кўп ёрдам беради, аммо буни кўпчилик илғамасдан қолади. Мухлислар посбонларнинг гол ўтказиб юборгандаги хатоларини кўришади холос. Яна қайтараман: майдонда ўйинчи – у дарвозабон бўладими ёки бошқа амплуа вакилими, хатога йўл қўйган маҳалда ҳамма фақат уни гапиришга, танқид қилишга тушиб кетади.

гужа_1

- Бугунги беллашувда АГМКнинг собиқ футболчилари сифатида сиз ва Эркин Бойдуллаев гол урдинглар. Айтинг-чи, бу шунчаки тасодифми ёки ўйин олдидан бу борада келишиб олганмидинглар?

- Йўқ, келишиб олмагандик. Шунчаки, ўйин пайтида воқеалар ривожи шундай тус олди холос. Жамоа ютар экан, таркибдаги у ёки бу футболчилар ўзларини кўрсатишлари мумкин. Бугун шундай бўлдики, бизнинг омадимиз чопди.

-  Айни пайтда “Қизилқум” ҳисобида бошқаларга нисбатан дуранг билан якунланган ўйинлар кўпроқ – 5 та. Бу нимадан далолат беради?

- Агар сиз бизнинг иштирокимиздаги ўйинларни кузатиб келаётган бўлсангиз, ўша бешта беллашувда дурангдан кўра ғалабани илиб кетишга яқинроқ бўлганимизни, лекин омадимиз чопмай қолганидан бохабар бўлсангиз керак. Футболда шундай ҳолатлар ҳам учрайдики, ҳаммаси ўзингиз хоҳлаган даражада якун топавермайди. Ҳолбуки, беллашувни ғалаба билан тугатиш мумкинлигига ишонасиз, пировардида эса...Шукрки, бугун омадимиз чопди ва зафар қучдик.

гужа5

- Жамоа олдига мавсумни учинчи ўринда якунлаш вазифаси қўйилган. Воқеликка реал назар билан қарайдиган бўлсак, бунинг иложи борлигига ишонасизми?

- Ўйлайманки, таркибдаги бор футболчилар билан совринли ўринлардан бирини эгаллаш вазифасини бажарса бўлади.

- Агар хато қилмаётган бўлсам, иккинчи голингизни урдингиз. Айтинг-чи, Суперлигада рақиб дарвозасини ишғол этиш сиз учун машаққатли ишга айланиб боряптими?

- Адашмадингиз, бу менинг Суперлигадаги иккинчи голим. Суперлигада гол киритиш осон эмас. Бунинг учун футболчидан астойдил тер тўкиш ва ўйинлар чоғида қулай фурсатни топиш талаб қилинади.

гужа2_1

- Актамов футболчиларни ўйинлар учун қандай руҳлантиради: пуллар биланми ёки...

- Пуллар билан боғлиқ масала бизда жойида. Қолаверса, клубимиздаги ички муҳит жуда яхши деган бўлардим.

- Биринчи даврадан кейин режаларингиз қандай?

- Бундан кейин ҳам “Қизилқум”да қолиб клубга ўз олдига қўйган вазифаларини бажаришида ёрдам беришни хоҳлайман.

- Суперлигада қайси рақибга қарши тўп суриш сиз учун жуда қийин?

- Суперлигада ўйинларнинг барчаси қийин кечади. Бу лигада ғалаба қозониш осон эмас. Ҳатто кучсиздек кўринган рақибдан ҳам кутилмаган сюрпризлар бўлиши мумкин.

- “Қизилқум”даги энг қувноқ ва жиддий футболчи ким?

- Жамоадаги энг қувноқ футболчи мен бўлсам керак. Энг жиддий ўйинчими, бу саволингизга жавоб топиб бера олмайманми, деб қўрқаман.

гужа4

- Ўзбекистон терма жамоаси тарихда биринчи марта ЖЧ саралашининг иккинчи босқичидан кейиноқ юришини тўхтатишга мажбур бўлди. Сизнинг бу ҳақидаги фикрингизни билмоқчи эдим...

- Ўйлайманки, терма жамоангизда кейинчалик яна ҳаммаси изига тушиб кетади. Қолаверса, Осиёда Европадаги сингари кучли терма жамоалар у қадар кўп эмас.

- Легионер сифатида омадсизликнинг асосий сабаби нимада деб ўйлайсиз?

- Менинг фикрим тўғрими ё хато қиляпманми билмайману, бу йўлда болалар мактаби у қадар самарали ишламаётган кўринади. Чунки эртанги кун келажаги ҳақида қайғуриш яқин йилларда ўз самарасини бермасдан қолмайди. Бу менинг шахсий фикрим.

- Сизнинг назарингизда миллий терма жамоамизни бошқариш учун ҳамюртингиз - Шота Арвеладзе энг муносиб номзодми?

- Кечирасиз, бу саволингизга жўяли жавоб айта олмасам керак. Нега деганда, терма жамоани кимга ишониб топширишни фақат ЎФА раҳбарияти ҳал қилади холос.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию
&
Ашуров Бахтийор
24/06/2021 06:05
Жавоблар ҳам,саволларга яраша-деломатик слуҳ тузувчиларникига ўхшайди.