"Қўқон-1912" Суперлиганинг илк турида "Андижон"ни ўз майдонида қабул қилади

Чемпионатнинг илк туридан ўрин олган "Қўқон-1912" - "Андижон" ўртасидаги беллашув Фарғонада ёки Қўқонда ўтказилиши борасида саволлар мавжуд эди. Ниҳоят, ЎзПФЛ бу борада якуний қарорни эълон қилди:

"Қўқондаги стадион майдони, унинг суғориш ва дренаж тизими аввалроқ янгиланган эди. Айни вақтда майдон футбол учрашувларини қабул қилишга тайёр. 

Бироқ стадион ёритиш тизими, майдон атрофига ёзилиши керак бўлган қоплама масаласида иш кечикканидан келиб чиқиб, Лига "Қўқон-1912" стадионини Суперлига учун қабул қилмаганди. Февраль ойи давомида клуб раҳбарияти мазкур масалаларни ҳал қилишга эришди. Шундан келиб чиқиб, Лига стадионни Суперлига беллашувлари учун рўйхатдан ўтказди.  

Маълумот учун, "Қўқон-1912" Суперлигага қуръа ташлаш маросими олдидан мажбурий равишда Фарғонадаги "Истиқлол" стадионини рўйхатдан ўтказган бўлиб, мазкур ҳолат Лига хавотирига сабаб бўлаётганди. Боиси, "Истиқлол" стадионида "Нефтчи" ва "ФарДУ" жамоаларининг тўп суриши аввалдан режалаштирилган бўлиб, "Қўқон-1912" клуби олдига Суперлига 3-турига қадар стадиондан чиқиб кетиш талаби қўйилганди. Қўқон шаҳридаги стадионнинг очилиши эса "Истиқлол" стадионига тушадиган зўриқишни нормаллаштиради", - дея расмий маълумот берди, ЎзПФЛ матбуот хизмати.