Қўқонда охирги ўйин ёхуд Суперлига чиптаси кимга насиб этади?

Ўзбекистон чемпионатининг жорий йилдагиси 1 декабрь куни ниҳоясига етди. Бироқ ҳали бу йилги мавсум тўлиқ тугагани йўқ. Режа бўйича 5 декабрь санасида ушбу йилдаги охирги расмий ўйин ўтказилади. Унда “Қўқон-1912” ҳамда “Қизилқум” жамоалари ўзаро баҳс олиб борадилар. Бу қандай учрашув эканини яхши биласиз. Суперлигага йўлланма берувчи ўйин. “Қизилқум” 12-ўрин соҳиби, “Қўқон-1912” эса про лигада 3-ўрин эгаси сифатида плей-оффда куч синашишади ва ютгани 2024 йили Суперлигада иштирок этади. Қўқонликлар ушбу баҳсгача дастлабки плей-оффда “Машъал”ни пенальтилар серияси орқали мағлубиятга учратди. Энди эса ҳал қилувчи, таъбир жоиз бўлса, бу йилги мавсумдаги ҳақиқий финалга хос учрашувда майдонга тушишади.

“Қизилқум” ҳам мазкур плей-офф ўйинидан қочиш ва тўғридан-тўғри жон сақлаб қолиш илинжида роса тер тўкди-ю, барибир якунда 12-ўрин навоийликларга насиб қилди. Бу охирги турда эмас, ундан аввалги турда ҳал бўлиб улгурганди. Шу сабабли “Қўқон-1912” ҳам, “Қизилқум” ҳам бир-бирини кузатиш ва ўрганиш учун етарли вақт бўлди. Суперлиганинг охирги турида “Қизилқум” Навоийда “Турон”ни қабул қилди. Бу ўйин иккала клубга ҳам ҳеч нима бермасди. “Турон” лигани тарк этиб улгурганди, “Қизилқум” ютган тақдирда ҳам 12-ўриндан қочиб қутула олмасди. Навоийликлар устози Жамшид Саидов Sports.uz сайтига берган интервьюсида “Турон”га қарши баҳс у қадар аҳамиятли эмаслигини, асосий эътиборни “Қўқон-1912”га қарши учрашувга қаратганини айтганди. “Турон” билан баҳсда у асосан иккинчи таркибни майдонга туширган ҳолда етакчиларига муҳим баҳс олдидан дам беришга қарор қилди. Ўз-ўзидан маълумки, Саидов асосий эътиборини бўлажак рақибга қаратган.

Аслида “Қўқон-1912”да плей-оффни четлаб ўтиб, тўғридан-тўғри Суперлигага қайтиш имконияти мавжуд эди. Лекин “Хоразм” ва “Динамо”га қарши беллашувларда дуранг ўйнаб қўйгани учун плей-оффда қолиб кетди. Шундай бўлса-да, Муҳсин Низомиддинов бошқарувидаги клубда имконият ҳамон сақланиб турибди. Энди битта ўйин ҳаммасини ҳал қилади. Бу сафар дуранг бўлмайди, кимдир ютиши шубҳасиз ва мажбур. Битта учрашувда ҳамма нарса бўлиши мумкин. Шунинг учун иккала клуб бўлажак ўйинга жуда жиддий тайёрланишмоқда.

Ўйиннинг Қўқонда ўтказилиши ва мухлислари қаршисида бўлиши мезбонларга қўшимча устунлик бериши мумкин. Бироқ “Қизилқум” Суперлига вакили ва уларга тажрибаси қўл келишини кўпчилик тахмин қилмоқда. Шунга қарамай, битта ўйинда исталган натижа юз бериши табиий.

Бу клублар охирги бор ўтган йили Суперлигада куч синашишган. Қўқондаги беллашувда 1:3 ҳисобида “Қизилқум”нинг қўли баланд келган. Навоийда эса томонлар 1:1 натижасига рози бўлишган. Умумий ҳисобда жамоалар чемпионатда ўзаро 24 маротаба тўқнаш келишган. “Қўқон-1912” ҳисобида 7 та, “Қизилқум”да 13 та ғалаба бор. 4 та учрашувда дуранг қайд этилган. Тўплар нисбати 27\41 навоийликлар фойдасига. Шу кунгача “Қизилқум” Қўқонда майдонида 6 та ғалаба ва 1 та дуранг қайд этган.

“Қўқон-1912”да Суперлигага қайтиш иштиёқи баланд. Улар бор эътиборини 5 декабрь куни бўладиган ўйинга қаратган. Чунки қўқонликлар Суперлигадан фақат битта ўйин ажратиб турганини яхши тушуниб туришибди. Ўртага Суперлига чиптаси тикилган учрашувда сизнингча ким ғалаба қозонади? Дарвоқе, Қўқонда VARдан фойдаланилади.

Шуҳратбек Жўраев.