Қозоғистон ФИФАнинг тарихий мусобақасида Ўзбекистондан ортда қолди
Минтақада ўзбек футболи энг кучли экани яна бир карра исботланди
Қозоғистон U-15 ўсмирлар терма жамоаси тарихда илк бор ўтказилган 15 ёшгача бўлган футболчилар ўртасидаги Жаҳон чемпионати ва ФИФА фестивалида 85-ўринни эгаллади. Мусобақа Боку (Озарбайжон) шаҳрида бўлиб ўтди, деб хабар бермоқда Sports.kz.
Турнирнинг сўнгги учрашувида қозоғистонлик ёш футболчилар Мозамбик терма жамоаси устидан 4:1 ҳисобида ғалаба қозонишди.
Якуний натижаларга кўра, Қозоғистон Марказий Осиё вакиллари орасида учинчи бўлди. Ушбу минтақада энг яхши кўрсаткични Ўзбекистон қайд этди — 42-ўрин. Қирғизистон 52-поғонадан жой олди. Тожикистон 97-ўринни, Туркманистон эса 121-ўринни эгаллади.
Гуруҳ босқичидаги Қозоғистон – Ўзбекистон баҳсини алоҳида таъкидлаш мумкин. Қўшнилар ўртасидаги беллашувда қозоғистонликлар 0:2 ҳисобида мағлубиятга учради. Ўзбекистон таркибида 28-дақиқада Жавоҳирбек Эркинов, 34-дақиқада эса Роман Айзаттулов гол урди.
Биринчи марта ташкил этилган FIFA U-15 World Cup & Festival мусобақасига 189 та миллий ассоциация вакиллари қатнашди. Турнир 24–30 октябрь кунлари ўтказилди. Ўйинлар 8×8 тартибида ўтказилиб, ҳар бир баҳс икки қисмдан иборат бўлди, ҳар бир тайм 20 дақиқадан ташкил этилди.
Изоҳлар (0)