Рафинья фаолиятини эрта тугатди

Бразилиялик ярим ҳимоячи Рафинья Алкантара профессионал футболчилик фаолиятини якунлаганини эълон қилди.

Ўз даврида “Барселона”, “Сельта”, “Реал Сосьедад”, “Интер” ва “Пари Сен-Жермен” каби машҳур клублар шарафини ҳимоя қилган собиқ футболчи 32 ёшида бутсаларини михга илишга қарор қилди.

Алкантара фаолиятидаги сўнгги клуб Қатарнинг “Ал-Араби” жамоаси бўлди. Моҳир футболчи бу жамоага 2022 йилнинг ёзида “Пари Сен-Жермен”дан кетганидан сўнг қўшилган эди.

Футболчилик фаолияти давомида Рафинья 358 та учрашувда майдонга тушиб, 51 та гол урди ва 52 та голли узатмани амалга оширди.

Шунингдек, унинг ютуқлари орасида “Барселона” таркибида қўлга киритилган Европа Чемпионлар лигаси ва УЕФА Суперкубоги совринлари, ҳамда 2016 йилги Олимпия ўйинларининг олтин медали ҳам мавжуд.