Рафинья футболчилик фаолиятини якунлади!

"Барселона", "Интер" ва ПСЖ клубларининг собиқ футболчиси Рафинья Алькантара профессионал футболчилик фаолиятини якунлаганини эълон қилди.

— Майдондан ташқарида ўтган маълум вақт ва узоқ тикланиш жараёнидан сўнг муҳим қарорни маълум қилиш пайти келди. Мен фаолиятимни якунлашга қарор қилдим.

Бир йилдан ортиқ вақт аввал олган тизза жароҳатим, афсуски, яна энг юқори даражада ўйнашимга имкон бермаяпти. Буни қабул қилиш осон бўлмади. Футбол ўзимни билганимдан бери ҳаётимнинг бир қисми бўлиб келган. Энди эса унга аввалгидек тўлиқ бағишлана олмаслигимни тушундим.

Сўнгги 20 йил давомида футбол кундалик ҳаётим, мени олға етакловчи куч бўлди. Бугун эса янги босқич бошланяпти — рақобат ҳаяжонисиз, аммо табассум қилиш учун сабабларга бой. Ҳар доим ёнимда бўлган оиламга раҳмат. Барча муҳаббат ва қўллаб-қувватлов учун миннатдорман. Мени шу инсонга айлантиргани учун футболга раҳмат. Яна кўришгунча, — деди Рафинья ижтимоий тармоқларда эълон қилинган видео мурожаатида.

Рафинья Алкантара "Барселона" академияси тарбияланувчиси ҳисобланади. Каталония клуби сафида у уч марта Испания чемпиони бўлган ва 2014/15 йилги мавсумда Чемпионлар лигасини қўлга киритган. Фаолияти давомида у "Сельта", ПСЖ, "Интер" ва "Реал Сосьедад" жамоаларида ҳам тўп сурган.

Шунингдек, Алкантара 2016 йилда Бразилия терма жамоаси билан Олимпия чемпиони бўлган. 32 ёшли футболчининг охирги клуби Қатарнинг "Ал-Араби" жамоаси бўлди.