Раньери ва Шомуродов А Серияни даҳшатга солмоқда

12 май, 09:44
Zohir Toshxo’jayev
1
Футбол

А Сериянинг 36-турини мусобақа жадвалида юқори ўринлар учун курашаётган “Аталанта” ва “Рома” жамоаларининг ўзаро тўқнашуви якунлаб беради.

Клаудио Раньери шогирдлари чемпионат давомида илк бор тўртинчи ўринни эгаллаб, Европа Чемпионлар учун курашда асосий рақобатчилари – “Ювентус” ва “Лацио”дан ўзиб кетиш имконига эга.

Чунки 36-турда бу икки рақобатчи ўзаро дуранг ўйнаб, 64 тадан очкога эга бўлди. Рим “бўрилари” эса, бир ўйн кам ўтказиб, бир очко кам жамғарган ҳолда ҳозирча олтинчи ўринда турибди.

Агар Клаудио Раньери жамоаси Бергамода уч очкони қўлга киритса, ростмана тўртинчи ўринга чиқиб олади ва у ёғи қолган иккита беллашувда бу устунликни ушлаб қолишга ҳаракат қилади.

Клаудио Раньери ўтган йили ноябрда “Рома”ни қабул қилиб олганидан дастлабки икки учрашувда мағлубият аламини тотиб кўрганди. Ўшанда фақат “Наполи” (0:1) ва “Аталанта” (0:2) римликларни таслим қила олган. 73 ёшли мураббий қисқа фурсатда “Рома”ни жанговар жамоага айлантирди ва ўша икки мағлубиятдан кейин “бўрилар”ни енгадигани топилмаяпти.

Шу тариқа, “Рома”нинг Италия чемпионатидаги мағлубиятсиз серияси 19 та учрашувга етди. Жамоа охирги икки баҳсда “Интер” ва “Фиорентина” устидан бир хил 1:0 ҳисоб ғалабага эришди. Амалдаги чемпион “Интер”нинг ўз майдонида римликларга ютқазгани миланликларга қимматга тушяпти. Чемпионлик учун курашдаги рақобатчи “Наполи” жамоаси римликларнинг ғалабасидан фойдаланиб, мусобақа жадвалида уч очко ўзиб кетди.

Римликлар Раньери қўл остида жуда зўр ўйин кўрсатмоқда. Ҳимояда деярли бехато ўйнаяпти. Ўйин комбинацияларга асосланган. Кейинги пайтда жамоанинг натижалари Элдор Шомуродовнинг ўйинига боғлиқ бўлиб қолди. Ўзбек легионери сўнгги бешта учрашувда тўртта самарали ҳаракатни амалга ошириб, “Ювентус” ва “Верона” дарвозасини ишғол қилди, “Интер” билан беллашувда Матиас Сулега, “Фиорентина”га қарши баҳсда Артём Довбикка голли пас узатиб, ғалаба тўпларини киритилишига сабабчи бўлди.

Рома ҳужумида ўйнаётган Шомуродов олдинги чизиқдаги барча жамоадошлари, хусусан, Артём Довбик билан бир бирини ҳар томонлама яхши тушуниб ҳаракат қилмоқда.

Ҳа, Клаудио Раньери шу мавсумнинг ўзида икки бор кетиш учун нарсаларини йиғиштирган Элдорни жамоанинг муҳим фигурасига айлатира олди. Ўтган йили “Кальяри”да бошланган устоз-шогирд алоқаси бугун Римда ҳам самара келтирмоқда ва А Серия клубларини хушёр тортишга мажбур қиляпти.

“Аталанта” чемпионатнинг биринчи қисмини жуда зўр ўтказди. Лекин бергамоликлар янги йилдан кейин ўтказилган 18 та учрашувдан атиги еттитасида ғалаба қозона олди холос. Ҳозир бу жамоа 68 очко билан учинчи ўринда мустаҳкам жойлашган. Гарчи чемпионликка даъвогарлик қила олмаса-да, Чемпионлар лигаси йўлланмасини қўлга киритиш учун имконият катта.

Бош мураббий Жан Пьеро Гасперини “Аталанта”да ҳужумкор футболни шакллантирган. Бироқ жамоа ўйинида кейинги пайтда вазифтлардан самарали фойдаланиш оқсамоқда.

“Аталанта” қудратли жамоа, лекин футбол экспертлари мавсумнинг ҳозирги якуний палласида “Рома” нисбатан кучлироқ эканини таъкидлашмоқда. Бўлажак баҳс пойтахтликлар учун мавсумнинг энг муҳим ўйинларидан бири ҳисобланади. Бу тўқнашувдаги ғалабанинг қадри ўта юқори. Шу боис, мухлисларни жуда қизғин беллашув кутиб турибди.

“Аталанта” ва “Рома” жамоалари ўртасидаги 36-турнинг охирги учрашуви 12 май куни Тошкент вақти билан соат 23:45 да бошланиши белгиланган.