Расман! Про лига формати ўзгаради, жамоалар Ўзбекистон кубоги йўлида рақобатлашади

ЎзПФЛ режасига кўра Про лига клублари 2020 йилги мавсумда 28 турдан иборат тўрт давра ўйинларида иштирок этиши керак эди. Пандемия сабаб юзага келган танаффус ҳамда жамоаларнинг моддий ҳолатидан келиб чиқиб, мусобақа формати ўзгаради. Бу ҳақда ташкилот расмий сайти хабар тарқатди.

Про лиганинг сакккиз клуби аввалига 14 турдан иборат уй-сафар тизимида куч синашади. Кейинчалик дастлабки тўрт ўрин эгалари алоҳида ва қуйи тўрт ўрин эгалари алоҳида яна икки давра — жами 6 та ўйинда иштирок этади. Шунда Про лиганинг барча клуби мавсум якунига қадар умумий 20 та тур учрашувида қатнашади. Бунда жамоалар жамғарган очколар сақланиб қолади. 

Сир эмаски, Про лига ғолиби Coca-Colа Суперлига йўлланмасини қўлга киритади. Лиганинг иккинчи жамоаси ўтиш ўйинида Суперлиганинг 13-клубини ўз уйида қабул қилади.  

Мазкур лиганинг саккиз клуби, шунингдек, Ўзбекистон Coca-Cola кубоги йўлида ҳам кураш олиб бориш имкониятига эга. Улар кубокнинг саралаш босқичида қатнашади. Саралаш ўйинлари Про лига учрашувларидан аввал бўлиб ўтади. Қуръа саккиз жамоани тўрт жуфтликка ажратиб беради. Иккинчи босқичга йўл олган тўрт жамоа яна икки жуфтлик ҳосил қилади. Ғолиблар Coca-Cola Суперлиганинг 14 клубига қўшилиб, кубокнинг гуруҳ босқичига йўлланма олади. 

Саралашнинг ҳар икки босқичида ҳам ўйинлар фақат битта бўлади. Мезбон жамоа номига қуръа ойдинлик киритиб беради. Биринчи босқични ўз уйида (ёки сафарда) ўтказган ғолиб иккинчи босқичда сафарга жўнайди (ёки мезбон бўлади). Ғолибнинг ҳар иккиси ҳам уйида ўйнаган бўлса (ёки сафарда), биринчи босқич қуръасида биринчи бўлиб саватдан тортилган жамоа ўз-ўзидан мезбонга айланади (ёки аксинча). Учрашувларнинг асосий вақтида ғолиб аниқланмаса, дарҳол пенальтилар сериясига навбат берилади. Бунга сабаб, клублар анча вақт машғулот ўтказмаган, қолаверса, ҳаво ҳарорати кўтарилишда давом этяпти. Coca-Cola Ўзбекистон кубогининг гуруҳ босқичидан кейинги чорак финал, ярим финал ва финал ўйинларида эса 120 дақиқалик қоида амалда бўлади. 

Кубокнинг саралаш учрашувлари санаси ҳамда Про лига ўйинларининг тақвими тез орада расман эълон қилинади.