Ратиньо "Нефтчи" мухлисларига нимани айтди?

Хабарингиз бор, Фарғонанинг "Нефтчи" клуби янги мавсумда ҳам чемпионлик учун курашиш ва ОЧЛ Элитда муносаб қатнашиш борасида таркибини янада мустаҳкамламоқда. Бу борада селекция ишлари жиддий равишда олиб бориляпти.

2024 йили "Динамо" сафига қўшилган пайтда бразилиялик Ратиньони айтарли ҳеч ким билмасди. Аммо ўтган вақт мобайнида ярим ҳимоячи ўз ўйини билан барчанинг меҳрини қозонди.

У "Динамо"да қисқа фурсат ичида ҳақиқий етакчига айланди. Футболчи икки йил ичида самарқандликлар сафида ҳаммаси бўлиб 53 та ўйинда майдонга тушди. 5 та гол урди ва 6 та голли узатмани бажарди.

Табиийки, ушбу легионерга талабгорлар бисёр эди. "Нефтчи" эса ҳаммадан илдамроқ ҳаракат қилиб, бразилиялик легионерни ўз сафига қўшиб олишга муваффақ бўлди. Ратиньо "Нефтчи"нинг ўйинига янада мазмун олиб киришига кўпчилик ишонмоқда.

"Нефтчи" матбуот хизмати Ратиньодан дастлабки интервьюни олди.

- "Нефтчи" жамоаси ҳақида шуни айта оламанки, бу буюк анъаналарга эга, доимо қўллаб-қувватлаб келадиган фидойи мухлислари бор ажойиб клуб. Ушбу катта жамоанинг бир қисми бўлганимдан жуда хурсандман ва клубнинг асосий мақсадларига эришишда ўз ҳиссамни қўшишни истайман.

Мухлислар менинг келишимдан катта меҳнат, фидойилик ва жамоанинг ушбу мавсумдаги муҳим мақсадларига эришиш йўлида бор кучимни сарфлашимни кутишлари мумкин. Умид қиламанки, мухлисларимиз мавсум бошидан охиригача бизни қўллаб-қувватлаб туришади. Менга берилган бу имконият учун барчангизга катта раҳмат!

Фурсатдан фойдаланиб барчани янги кириб келаётган янги йил билан табриклайман!", - дейди Ратиньо.