Равшан Ҳайдаров: "Мухлисларимизга алоҳида раҳмат! Бундай атмосферада тўп тепиш йигитлар учун фахр"

20 ёшгача бўлган футболчилар ўртасидаги Осиё Кубоги ярим финалидан ўрин олган Ўзбекистон - Жанубий Корея учрашувида : ҳисоби қайд этилди. Беллашувдан кейин ташкил этилган матбуот анжуманида ҳамюртларимиз бош мураббийи Равшан Ҳайдаров иштирок этиб, қуйидаги фикрларни билдириб ўтди:

"Авваломбор, Ўзбекистон ҳалқини, футболчиларни, жамоадаги барча-барчани финалга чиққанимиз билан табриклайман! Икки жамоа бир-бирига тенг эканини кўрсатиб берди ва майдонда шиддатли ўйин намойиш этди. Ўйиннинг асосий вақтида масалани ҳал қилишга уриндик. Аммо омад учрашув вақтида бизга кулиб боқмади. Яна пенальтилар сериясига қадар етиб келдик ва унда дарвозабонимизнинг қаҳрамонликлари эвазига зафар қучдик. Мен йигитлар билан фаҳрланаман. Улар бугун ўзларининг энг яхши ўйинини кўрсатишди. Уларга миннатдорчилигимни изҳор этаман!

Захирадан учрашувга қўшилганларнинг баҳсга киришиб кетиши қийин бўлди. Йигитлар бир-иккита вазиятда гол ура олмади. Шунингдек, захирадан тушган Жўрабоевнинг майдондан олиниши фақат ва фақат унинг сариқ карточка олгани билан боғлиқ. Шунга қарамай, кейинчалик айнан захирадан тушган футболчилар яхшигина беллашувга тезлик қўшиб беришди ва майдонда устунлигимизни таъминлаган асосий омил бўлди.

Йигитлар кўплаб вазиятлар яратишяпти. Афсуски, гол уришимиз учун нимадир етишмай қолмоқда. Бунинг устида ишлашимиз керак. Жаҳон чемпионатидаги иштирокка қадар камчиликларимизни тўғрилашга ҳаракат қиламиз.

Мухлисларимизга алоҳида раҳмат. Бундай атмосферада тўп тепиш йигитлар учун фахр. Тўғри, босим ҳам сезилди. Айниқса, илк учрашувда бу яққол сезилди. Шунга қарамай, биз ушбу атмосферадан ижобий натижа билан чиқишимиз керак. Энергияни ҳис қилган ҳолда ғалабани қўлга киритиш ҳақида ўйлаш лозим.

Финал олдидан шунга яраша тайёргарлик кўрамиз. Тўғри, кўп куч йўқотдик. Тикланиш жараёнлари устида иш олиб боришимиз муҳим. Кейинги ўйинда ҳам футболчилар тўғри йўналишда шуғулланиб, чарчоқларсиз финалга етиб боришга уринамиз. Ҳал қилувчи беллашувда ҳам жисмонан, ҳам руҳан кучли бўлмоғимиз даркор.

Қайси авлод бўлишидан қатъи назар ёшлар билан ишлашда давом этаман. Ҳозир мен шу йигитларнинг бош мураббийиман. Эртага нима бўлишини вақт кўрсатади. Асосан, биз бу ёшдаги футболчиларни МТЖга тайёрлаб боришни мақсад қилганмиз. Улар ҳалқаро турнирларда, йирик мусобақаларда иштирок этиб ўсишга эришади. Албатта, бу ривожланиш мамлакат футболига ҳам ўз таъсирини ўтказади. Тизимли тарзда янги етишиб чиқаётган ўйинчиларни катта ўйинларга тайёрлаб, футболимиз ривожига ҳисса қўшишни истаймиз", - деди мутахассис.