“Реал” 100 миллион еврога баҳоланган ҳужумчини олади

Европа Чемпионлар лигаси ва Франция чемпионатининг амалдаги ғолиби “Пари Сен-Жермен” таркибида ўйнаётган ҳужумчи Дезире Дуэ Мадриднинг “Реал” клуби нишонига  тушди.

“Қироллик клуби” келажаги порлоқ дея эътироф этилаётган ёш футболчини сотиб олиш имкониятини жиддий кўриб чиқмоқда.

“Реал” мутасаддилари иқтидори тобора очилиб бораётган Дуэ трансфери учун 100 миллион евро тўлашга тайёр. Бу ҳақда El Nacional журналистлари хабар бермоқда.

Мадридликлар Дуэга Париж жамоасида олаётганидан кўра кўпроқ ўйин вақти таклиф қилиш орқали ёш ҳужумчини ўзига оғдириб олмоқчи.

Дезире Дуэ 2024 йилда “Ренн”дан ПСЖга 50 миллион евро эвазига ўтган. Футболчининг шартномаси 2029 йилнинг июнигача амал қилади. Жорий мавсумда ҳужумчи парижликлар сафида барча мусобақаларда 23 та ўйин ўтказиб, 8 та гол урди ва 5 та голли узатма берди.

Transfermarkt портали футболчининг қийматини 90 миллион евро деб баҳоламоқда. Яқида Дезире Дуэ Globe Soccer Awards версиясига кўра, 2025 йилнинг энг яхши ёш футболчиси, деб топилган.