“Реал” 213 миллион евролик трансфер учун уч футболчини сотувга қўйди

Мадриднинг “Реал” клуби трансфер бозорида фаол ишлашда давом этмоқда ва “Бавария” қанот ҳужумчиси Майкл Олисе учун рекорд даражадаги таклиф тайёрламоқда.

El Debate маълумотига кўра, мадридликлар Германия клубига 180 миллион евро ҳамда яна 33 миллион евро миқдорида бонус таклиф қилишни режалаштирган. Шу тариқа, битимнинг умумий қиймати 213 миллион еврога етиши мумкин.

Агар трансфер амалга ошса, Олисе Неймардан кейин футбол тарихидаги иккинчи энг қиммат футболчига айланади.

Қайд этилишича, “Атлетико” ҳужумчиси Хулиан Альваресни сотиб олишга бўлган уриниш муваффақиятсиз якунланганидан сўнг, “Реал” бутун эътиборини Олисега қаратган. Бироқ “Бавария” раҳбарияти аввалроқ жамоа етакчиларидан бири билан хайрлашиш нияти йўқлигини билдирган эди.

Эҳтимолий трансферни молиялаштириш учун мадридликлар бир вақтнинг ўзида уч нафар футболчини сотувга қўйишга тайёр. Манба маълумотига кўра, гап Алваро Каррерас, Дин Хёйсен ва Эдуардо Камавинга ҳақида кетмоқда. “Реал” уларнинг трансферларидан тахминан 120 миллион евро ишлаб олишни режалаштирмоқда.

Эслатиб ўтамиз, бу ёзда “Реал” ҳозиргача Бернарду Силва, Иброҳим Конате, Марк Кукурелья ва Дензел Дюмфрисни ўз сафига қўшиб олган, шунингдек бош мураббийлик лавозимига Жозе Моуриньони қайтарган.