“Реал” 6 суперклуб талашаётган юлдуз бўйича якуний қарорга келди

Туркия миллий терма жамоаси ва “Реал” клуби футболчиси Арда Гюлер Европанинг топ лигаларидаги олтита клуб раҳбариятида жиддий қизиқиш уйғотмоқда.

20 ёшли ҳужумкор футболчини Германиянинг “Боруссия Дортмунд” ва “Лейпциг”, Италиянинг “Милан”, Англиянинг “Арсенал”, “Ньюкасл” ҳамда “Тоттенхэм” каби улаблари ўз сафига қўшиб олишни режалаштиряпти.

Caught Offside нашрининг ёзишича, Хаби Алонсо даврида жамоанинг муҳим ўйинчисига айланган Гюлерга мадридликлар узоқ муддатли лойиҳаларда ҳам жой ажратишга қарор қилган. Шу боис, “Қироллик клуби” турк футболчисини осонликча қўйиб юбормайди.

Мадридликлар Ардани 2023 йилнинг ёзида “Фенербаҳче”дан 24 миллион еврога трансфер қилган. Клуб билан 2029 йилнинг ёзигача давом этадиган шартномага эга ўйинчининг бугунги кундаги нархи икки бараварга ошди.