"Реал" "Adidas" билан шартномани яна саккиз йилга узайтирди

Мадриднинг "Реал" клуби "Adidas" компанияси билан ҳамкорликни давом эттириш бўйича янги келишув имзолаганини расман эълон қилди.

"Қироллик клуби" расмий сайтида берилган маълумотга кўра, томонлар ҳамкорликни яна саккиз йилга узайтиришга келишиб олган.

"Реал" илк бор Adidas билан 1980 йилда шартнома тузган эди. Шундан буён икки томон ўртасидаги ҳамкорлик жаҳон футболидаги энг машҳур шерикликлардан бирига айланди.

Клуб баёнотида таъкидланишича, Adidas либосларида ҳаракат қилган "Реал" Европа футболида етакчига айланиб, 8 марта Чемпионлар лигаси бош совринини қўлга киритган.

"35 йилдан ортиқ давом этаётган бу ҳамкорлик давомида яратилган дизайнлар клуб тарихи, маданияти ва мухлисларига ҳурмат рамзи бўлиб келди", — дейилади хабарда.

Эслатиб ўтамиз, ўтган мавсум Ла Лигада "Реал" иккинчи ўринни эгаллаб, чемпионликни "Барселона"га бой берган эди. Аввалроқ мадридликлар "Fly Emirates" авиакомпанияси билан ҳам ҳамкорликни узайтиргани хабар қилинганди.