“Реал” Англиядан уч нафар зўр футболчини олиб кетади

“Реал” ёзги трансферлар ойнаси вақтида таркибини жиддий тарзда кучайтиришга қарор қилди. Мадридликлар янги ўйинчиларни Англия Премьер-лигасидан олиб келмоқчи.

Испаниянинг нуфузли манбаси – fichajes.net сайтининг ёзишича, “Қироллик клуби” ўз лойиҳасига  Трент Александер-Арнольд, Адам Уортон ва Вильям Салибани жалб қилмоқчи.

Трент Александер Арнольд – “Ливерпуль”ҳимоячиси 30 июнь куни эркин агентга айланади. Айнан мана шу омил 26 ёшли ҳимоячининг бозорини қайнатмоқда. Мадридликлар Трентни ўнг қанот ҳимоячиси Дани Карвахалнинг ўрнига олиб келади.

Адам Уортон – “Реал” мутасаддилари ярим ҳимояни “Кристал Пэлас”да порлаётган 21 ёшли ўйинчи ёрдамида кучайтиришни кўзлаяпти. Майлонни яхши кўра олиш, ўйинни ўқий олиш қобилияти ва аниқ тўп узатиш Уортоннинг кучли жиҳатлари сифатида эътироф этиляпти.

Вильям Салиба – “Реал” президенти Флорентино Перес ҳимоя марказига айнан “Арсенал” футболчиси олиб келинишини талаб қилмоқда. Франциялик ҳимоячининг “канонирлар” билан амалдаги шартномаси 2027 йилнинг ёзигача давом этади. Мадридликлар қийин трансферни уддалаш учун пулни аямаслиги керак.