"Реал" Артетани янги бош мураббий сифатида кўрмоқда

Мадриднинг "Реал" клуби жамоа бош мураббийлигига номзодларни ўрганиш жараёнида. Улардан бири "Арсенал"ни бошқараётган испаниялик мутахассис Микель Артета ҳисобланади. Бу ҳақда TEAMtalk хабар бермоқда.

Манбага кўра, "қаймоқранглилар"нинг амалдаги бош мураббийи Альваро Арбелоа кейинги мавсумда ҳам ушбу лавозимда қолиши даргумон. Бироқ, "Арсенал" спорт директори Андреа Берта ва Артета айни дамда 43 ёшли мутахассиснинг янги шартномаси бўйича музокаралар олиб бормоқда.

Испаниялик мутахассис Лондон клубини 2019 йилнинг декабридан буён бошқариб келмоқда. Унинг қўл остида "канонирлар" Англия кубоги ва икки карра Англия Суперкубогини қўлга киритган. Артетанинг "Арсенал" билан шартномаси 2027 йилнинг ёзигача мўлжалланган.