"Реал" чақирганди, лекин мен рад этганман!

Черногориялик ҳужумчи Стеван Йоветич ўтган ўн йиллик бошида уни Мадриднинг «Реал» таклиф этгани, аммо ўша пайтда бу имкониятдан воз кечгани ва ҳозир бу қарордан афсусда эканини айтди.

«Эҳтимол, бир қарор борки, уни қайта қабул қилмасдим. «Фиорентина»да иккинчи мавсумини ўтказаётган пайтимда менга «Реал»дан қизиқиш бўлган. Лекин ўша вақтда бундай катта қадамга тайёрман, деб ҳис қилмаганман. 

Доимий ўйнаб турардим, бахтли эдим, ишларим яхши кетаётганди. Ўзимга: «Яна бир-икки йил шу ерда қоламан, кейин кетаман», дердим. Оқибатда эса у ерга умуман ўтмадим. Кейинчалик «Манчестер Сити», «Интер», «Севилья» ва бошқа кўплаб жамоаларда ўйнадим», – дея футболчининг сўзларини келтиради derbyderbyderby.it.

Ҳозирда Йоветич эркин агент мақомида, аммо у ҳали фаол ўйинчилик фаолиятини якунлагани йўқ.