"Реал"да рўй берган Вальверде ва Тчуамени уруши нима билан тугади?

Баҳор ойларида футбол жамоатчилигини «Реал» ичкарисидаги можаро ҳақидаги хабарлар жиддий ҳайратга солган эди. Матбуотда ёзилишича, жамоа кийиниш хонасида Федерико Вальверде ва Орельен Тчуамени ўртасида кескин тортишув келиб чиққан, уруш даражасигача боргани, ҳатто уругвайлик ярим ҳимоячига тикиш қўйишга тўғри келгани айтилган. Вальверденинг ўзи эса буни рад этиб, уриш бўлмаганини, фақат можаро пайтида столга урилиб олганини таъкидлаган. Шунга қарамасдан, ўша пайтда «Реал» раҳбарияти ҳар икки футболчини ҳам катта миқдорда жаримага тортгани хабар қилинган эди.

Клубга яқин манбаларга эга бўлган журналист Хавьер Эррайснинг таъкидлашича, ҳозир Вальверде ва Тчуамени ўртасида ҳеч қандай муаммо қолмаган.

«Мен уларнинг муносабатлари ҳақида қизиқиб сўрадим ва улар яхши экани айтилди. Жамоага яқин бўлган бир инсон менга, улар жуда яқин дўст эмас, лекин можарони бутунлай ортда қолдиришганини айтди. Улар профессионал ва етук футболчилар, эндиликда муаммо бўлмайди. 

Ишончли манбалар Вальверде ва Тчуамени барча келишмовчиликларни ҳал қилганини тасдиқлашди. Ўйлайманки, яқин вақтларда уларни яна бирга майдонда кўрамиз», – деди Эррайс SER Deportivos дастурига берган интервьюсида.