“Реал” футболчиси Францияга йўл олиши арафасида

"Реал" жамоаси ҳужумчиси Эндрик фаолиятини Франция клубида давом эттиришга яқин турибди. Бу ҳақда журналист Экрем Конур хабар берди.

Манба хабарига кўра, Франциянинг "Лион"  жамоаси 19 ёшли футболчини қишки трансфер ойнасида ижарага олишни режалаштирмоқда. Лекин футболчининг маоши "Реал" томонидан тўланади. Томонларнинг келишувида бразилиялик футболчи иштирок этиши шарт бўлган минимал ўйинлар сони белгиланади. Эндрик жароҳат олган ҳолатда "қироллик клуби" уни қайтариб олиш ҳуқуқига эга бўлади. 

Форварднинг ҳозирда трансфер бозоридаги нархи 35 миллион еврога баҳоланмоқда. Унинг "қаймоқранглилар" билан амалдаги шартномаси 2030 йилгача мўлжалланган.

Эслатиб ўтамиз, мадридликлар Эндрикни 2024 йилдан "Палмейрас" дан 47,5 миллион еврога сотиб олганди. Шу давр мобайнида футболчи 38 та учрашувда майдонга тушиб, 7 та гол киритган ва 1 та голли узатмани амалга оширган.