“Real” hujumchisi superklublardan taklif kutyapti

“Real” hujumchisi Luka Yovich yozda jamoasini o‘zgartirishi mumkin, deb xabar bermoqda Marca nashri.

Manbaning ta’kidlashicha, qishki transferlar vaqtida ham serbiyalik hujumchiga Evropaning bir necha nomdor klublaridan qiziqish bo‘lgan, lekin ularning hech biri rasmiy taklif yubormagan.

Yovich yozda yana bir necha klubdan chaqiruv kutyapti. Ma’lumotlarga ko‘ra, “Real”da o‘ynab keta olmaganiga qaramay, Lukaga Angliya chempionatidan “Arsenal” va “Everton”, A Seriyadan “Milan” va Bundesligadan “Borussiya D” jiddiy qiziqish bildirmoqda.

Luka Yovich joriy mavsumda Ispaniya chempionatida 13 marta maydonga chiqib, atigi bir marta gol nishonladi. Uning shartnomasi 2025 yilning yarmigacha davom etadi. Transfermarkt portali serbiyalik hujumchining transferini 20 million evroga baholadi.

“Qirollik klubi” 24 yoshli hujumchi uchun 2019 yilda “Ayntraxt”ga 63 million evro to‘lagan.