“Реал” ҳужумчисини 6 суперклуб талашяпти

Хаби Алонсо “Реал” академиясида тарбияланган Гонсало Гарсияни мавсум олдидан биринчи жамоага қабул қилган эди. Бунга иқтидорли ҳужумчининг АҚШда клублар ўртасида ўтказилган жаҳон чемпионатига ёрқин ўйини сабаб бўлган.

Бироқ янги мавсумда 21 ёшли футболчига етарли даражада ўйин амалиёти берилмаяпти. Чунки “Реал”нинг ҳужум чизиғида ақлбовар қилмас даражада кучли рақобат вужудга келган.

Гонсало Гарсия атрофидаги вазиятни кузатиб бораётган клублар қишки трансферлар даврида уни ижарага олишга ёки тўлиқ трансфер қилишга уриниб кўрмоқчи.

Таниқли инсайдер Экрем Конурнинг маълум қилишича, ҳозирнинг ўзида олти клуб, хусусан,  Италиянинг “Милан” ва “Наполи”, Англиянинг “Вест Хэм”, “Астон Вилла”, “Фулхэм”, Испаниянинг “Севилья” жамоаси Гарсия билан ҳамкорлик қилишга тайёр.

Манбага кўра, юқорида номи келтирилган клублар Гонсало Гарсияни 20-25 миллион еврога трансфер қилишни мўлжаллаган. Бироқ “Қироллик клуби” янги юлдузини сотиб юборишни истамаяпти. Шу боис, Гонсалонинг хизматидан фойдаланмоқчи бўлган даъвогарлар “Реал”ни ҳужумчини ижарага беришга кўндиришга уриниб кўради.