"Реал ТВ" Вальверденинг қизил карточкасига кескин муносабат билдирди

"Реал Мадрид ТВ" бошловчилари ва экспертлари "Атлетико"га қарши ўйинда (3:2) Федерико Вальверденинг четлатилишига баҳо берди.

Уларнинг фикрича, бош ҳакам Хосе Мунуэра Монтеро қабул қилган қарор ва қоидаларни қўллашдаги икки хил стандартлар дербидаги ғалабани янада қийинлаштирган.

"Бу эпизодда оддий қоидабузарлик ва сариқ карточка етарли эди. Ҳатто Вальверде ҳам дастлаб шундай деб ўйлади. Аммо ҳакам уни майдондан четлатиб, кейин бу қарорини изоҳлаш учун Альваро Арбелоа билан мулоқот қилди — бу жуда кам учрайдиган ҳолат.

Оёқ ва тўп орасида қанча масофа бўлиши керак? Ҳакам тўп ўйинда эмаслигини қандай аниқлади, агар рақиб унга тегган бўлса? Қандай қилиб зарбанинг кучини баҳолаш мумкин? Бу ҳолатда тўғридан-тўғри қизил карточка бериш — тушунарсиз қарор", — дейилди клуб канали эфирида.

Таъкидланишича, ушбу қарор "Реал"ни камчиликда қолдириб, жамоанинг нафақат ушбу ўйиндаги, балки яқин ўйинлардаги имкониятларига ҳам таъсир қилиши мумкин.