"Реал" Винисиус фақат битта клубга кетиши мумкин, деб ҳисоблайди

«Реал» клуби ҳужумчиси Винисиус Жуниорнинг келажаги ҳануз ноаниқлигича қолмоқда. Бразилиялик футболчининг Мадрид жамоаси билан амалдаги шартномаси 2027 йил ўрталаригача мўлжалланган. Шу боис, агар томонлар келишувни узайтиришга эришмаса, клуб уни келаси йил эркин агент сифатида йўқотиб қўймаслик учун трансферга қўйиши мантиқан мақбул вариант сифатида кўрилмоқда.

ESPN нашри маълумотига кўра, «Реал» Винисиус Жуниорни сотиш эҳтимоли юзага келган тақдирда, унинг кейинги манзили сифатида асосан «Арсенал» клубини кўриб чиқмоқда. Манбанинг таъкидлашича, ҳозирча айнан лондонликлар Винисиус учун реал вариант сифатида қаралмоқда.

«Арсенал» эса 26 ёшли ҳужумчини сотиб олиш молиявий жиҳатдан қанчалик мақбул эканини ўрганаётгани айтилмоқда. Лондон клуби трансфер нархи, маош миқдори ва умумий харажатлар клуб бюджетига қай даражада мос келишини таҳлил қилмоқда.

Аввалроқ оммавий ахборот воситаларида Винисиус Жуниор ва «Реал» раҳбарияти молиявий шартлар бўйича бир-бирига ён беришни истамаётгани ҳақида хабарлар пайдо бўлган эди. Бу эса футболчининг клубдаги келажаги янада ноаниқлашишига сабаб бўлмоқда.