“Реал” Винисиус Жуниорни қўйиб юборишга рози бўлди, фақат...

“Реал”нинг кейинги йиллардаги асосий тўпурари Винисиус Жуниор жамоани тарк этиши мумкин.

Marca нашрининг маълум қилишича, Саудия Арабистонининг “Ал-Аҳли” клуби бразилиялик футболчига жиддий қизиқиш билдиряпти.

Мадридликлар шайхларга жуда оғир шарт қўйди. Улар бу трансфер учун 1 миллиард евро миқдорида бадал пули тўлаши талаб этилмоқда.

Ҳали жаҳон футболида бунақа савдо кузатилмаган. Трансферлар ҳажми бўйича рекорд 2017 йили ўрнатилган ва у ҳали ҳам янгилангани йўқ. Ўшанда ПСЖ Неймар учун “Барселона”га 222 миллион евро тўлаган эди.

Transfermarkt портали экспертлари “Қироллик клуби” билан 2027 йилнинг ёзигача давом этадиган шартнома билан боғланган Винисиус Жуниорни 200 миллион еврога баҳолаган.