“Реал” Винисиус ўрнига Англиядан зериккан юлдузни олиб келади

Бир неча воситачилар ва агентлар Мадриднинг “Реал” клубига “Арсенал”нинг қанот ҳужумчиси Габриэл Мартинеллини олишни таклиф қилмоқда.

“Қироллик клуби” раҳбарияти ҳам Мартинелли клубдан катта маош талаб қилиш эвазига янги битим тузиш масаласини чўзиб келаётган Винисиус Жуниор учун эҳтимолий ўринбосар сифатида кўрмоқда.

Бу ҳақда Defensa Central нашри хабар берди.

Манба маълумотларига кўра, 24 ёшли футболчининг трансфери қиймати тахминан 100 миллион еврони ташкил қилиши мумкин, аммо якуний сумма бундан камроқ бўлиши ҳам эҳтимолдан холи эмас. Мартинелли Лондон клубида етти йил ўтказганидан сўнг, жамоадан кетиш вариантларини кўриб чиқишга тайёр.

Жорий мавсумда “Арсенал” ҳужумчиси барча мусобақалар доирасида 25 та ўйинда майдонга тушиб, 9 та гол ва 1 та голли узатма билан ажралиб турди. Футболчининг клуб билан амалдаги меҳнат шартномаси 2027 йил ёзигача мўлжалланган. Transfermarkt портали маълумотларига кўра, унинг бозор қиймати ҳозирда 45 миллион еврога тенг.