“Реал” Винисиус ўрнига суперфутболчи топиб қўйди

“Реал” раҳбарияти Саудия Арабистони клубларидан бирига кетиш эҳтимоли ошиб бораётган Винисиус Жуниор ўрнига бошқа футболчи топиб қўйди.

Sport.es сайтининг маълум қилишича, агар бразилиялик ҳужумкор футболчи Мадридни тарк этадиган бўлса, “Қироллик клуби” унинг ўрнига “Атлетик Бильбао” етакчиси Нико Уильямсни олиб келади.

Айни пайтда “Реал” ва Винисиус ўртасида 2030 йилнинг ярмигача давом этадиган янги шартнома бўйича музокара давом этмоқда. Бразилиялик ҳужумчи клубда энг катта маош берилишини талаб қиляпти.

Клуб хўжайини Флорентино Перес ички муҳит бузилмаслиги учун Винисиуснинг талабини қондирмоқчи эмас. Шу боис, Винисиус унга ўта катта маош ваъда қилаётган саудиялик шайхлар таклифини қабул қилиши мумкинлиги айтиляпти.