"Реал" янги ҳужумчиси гол уролмаяпти. Моуриньо Диоманде танқидига жавоб берди

«Реал» бош мураббийи Жозе Моуринью жамоага ёзда қўшилган 19 ёшли Кот-д’Ивуар ҳужумчиси Ян Диоманде ўйинига баҳо берди. Ёш форвард ёзги трансфер ойнасидан «Лейпциг» клубидан 140 миллион евро (бонуслар билан бирга) эвазига олиб келинган эди. Аммо у мадридликлар сафида ўтказган олти учрашувида ҳали гол ҳам, голли узатма ҳам қайд этмади.

«У ривожланишда давом этади. Юқори даражада ўйнаётганига ҳали кўп бўлмади, тактика жиҳатидан ўрганадиган жиҳатлари жуда кўп. Лекин унинг салоҳияти жуда катта: бирга-бир вазиятларда, узатмаларда, зарбаларда… У бизга майдонда турли вариантлар беради. Вини [Винисиус] ўрнида ҳам, ўнг қанотда ҳам ўйнай олади, бу ерда Арда [Гюлер] ҳам ҳаракат қилиши мумкин, шунингдек Беллингем позициясида ҳам тўп суриши мумкин. Ҳозирги мақсадим – унга ўсишида ёрдам бериш», – деди Моуриньо.

Кеча «Реал» ўз майдонида «Райо Вальекано»ни 4:1 ҳисобида мағлуб этди. Диоманде ушбу учрашувни асосий таркибда бошлади ва 72 дақиқа майдонда тўп сурди, шундан сўнг унинг ўрнига Арда Гюлер майдонга туширилди.