“Реал” юлдузини номи сир тутилаётган жамоага таклиф қилишди

“Реал”нинг бразилиялик ҳужумчиси Эндрик фаолиятида жиддий бурилишни амалга оширмоқчи. 2024 йилнинг ёзида “Палмейрас”дан олиб келинган истеъдодли ўйинчи январда бошқа клубга кўчиб ўтади.

Хаби Алонсо “Реал”ни қабул қилиб олганидан кейин Эндрикнинг ишлари юришмай қолди. Аввалги мураббий Карло Анчелотти кам бўлса-да, 19 ёшли футболчига ўйнаш имконини берарди.

Бошқарув Алонсога ўтганидан бери Эндрик бирор маротаба майдонга тушгани йўқ. Бу ҳолат футболчини ҳеч бўлмаганда ижарага кетишга сабаб бўляпти. Чунки Эндрик 2026 йилги жаҳон чемпионатига бормоқчи. “Реал”дек клуб захирасида ўтирган футболчи ҳам Бразилиядек терма жамоага жалб қилинмаслиги аниқ.

Шу боис, Эндрик январда ижарага ўтишга рози бўлган. Клуб ҳам унинг кетишига тўсқинлик қилмайди.

Таниқли инсайдер Николо Скиранинг маълум қилишича, футболчининг агентлари унинг хизматларини А Сериянинг икки клубига таклиф этди. Ҳозирча, бу жамоалар номи сир тутилмоқда ва музокаралар давом этяпти.

“Қироллик клуби” билан 2030 йилнинг ёзигача амал қиладиган шартномага эга Эндрикнинг трансфер нархи 35 миллион еврони ташкил қилади.