“Реал”да ҳеч қачон сотилмайдиган футболчи бор

“Реал” раҳбарияти янги жамоани Каземиро атрофида қуришга қарор қилди ва шу боис, бу футболчи трансфери бўйича ҳар қандай таклифга рад жавоби берилади.

Маълумотларга қараганда, “Қироллик клуби” ҳар қандай вазиятда ҳам Каземирони сақлаб қолишга ҳаракат қилади ва бунда трансфер учун таклиф қилинаётган сумманинг миқдори умуман роль ўйнамайди.

Агар ёзда бош мураббий Зинедин Зидан жамоани тарк этса ҳам, унинг ўрнига келадиган мутахассис жамоани айнан Каземиро атрофида шакллантиришига тўғри келади.

Каземирога ПСЖ анчадан бери оғиз солмоқда. Унинг мадридликлар билан шартномаси 2023 йилнинг ёзигача давом этади. “Реал” хўжайинлари жамоа сардори Серхио Рамос масаласи ҳал бўлганидан кейин Каземиро билан янги шартнома тузиш бўйича иш бошлайди.

28 ёшли ўйинчи жорий мавсумда 19 та учрашувда қатнашиб, рақиблар дарвозига тўртта гол урди.