“Реал”га Конате камлик қилади. Мадридга “Сити” марказий ҳимоячиси керак

Мадриднинг “Реал” клуби “Ливерпуль”ни тарк этган  ҳимоячиси Иброҳим Конате билан шартнома имзолаган бўлса-да, марказий ҳимоя учун яна янги ижрочи олишга қарор қилди.

“Қироллик клуби” мутасаддилари “Манчестер Сити” марказий ҳимоячиси Йошко Гвардиолни харид қилиш вариантини ҳам истисно қилмаяпти. Бу ҳақда AS нашри хабар бермоқда.

Манба маълумотига кўра, агар клуб президентлиги сайловида Флорентино Перес ғалаба қозонса, испан гранди хорват футболчисини сотиб олиши мумкин. Гвардиолнинг ўзи ҳам “Реал” сафида тўп суришни истамоқда, бироқ “Манчестер Сити” 24 ёшли ҳимоячини сотиш ниятида эмас. Шу билан бирга, мадридликлар футболчи учун сунъий равишда оширилган маблағни тўлашни режалаштирмаяпти.

Гвардиол 2023 йил ёзидан буён “Манчестер Сити” шарафини ҳимоя қилиб келмоқда. Унинг амалдаги шартномаси 2028 йил ёзига қадар мўлжалланган. Transfermarkt маълумотига кўра, футболчининг бозор қиймати 70 миллион еврони ташкил этади.