"Реал"нинг асосий трансфер мақсади қайси футболчи эканлиги маълум

Дортмунднинг "Боруссия" клуби футболчиси Жуд Беллингем фаолиятини Европа футболидаги энг номдор клубларидан бирида давом эттириши мумкин. Англиялик футболчига "Реал" жиддий қизиқиш билдирмоқда.

AS нашри хабарига кўра, испан гранди 18 ёшли футболчини сотиб олиш борасида музокара олиб боришга тайёргарлик кўрмоқда. Беллингем мадридликларнинг ёздаги асосий трансфер мақсадига айланди. Жудни "қаймоқранглилар"дан ташқари "Ливерпуль" ва "Челси" клублари ҳам қўлга киритишга уриниб кўрмоқчи.

Беллингемнинг трансфер қиймати 80 миллион еврога баҳоланмоқда. 2021/2022 йилги мавсумда футболчи "Боруссия" сафида 44 та ўйин ўтказиб, 6 гол ва 14 ассист муаллифига айланган. Унинг "асалари"лар билан шартномаси 2025 йилнинг ёзига қадар амал қилади.