Режалар катта ёхуд Почеттино "Челси"га кимларни олиб келмоқчи?

2022 йилда Тодд Боули "Челси"ни 4 миллиард евродан кўпроқ тўлаган ҳолда сотиб олди, яъни 19 йилдан кейин Абрамович даври ўз ниҳоясига етди. Романнинг сал олдинроқ клубни тарк этиши натижасида раҳбарият қилиши керак бўлган айрим ишлар чала қолиб кетди. Аниқроқ айтадиган бўлсак, Рюдигер, Кристенсен ва Алонсолар билан шартнома муддати узайтирилмади ва улар эркин агент сифатида жамоадан кетди. Шунингдек, Азпликуета ҳам "Барса"га ўтиб кетиши мумкин эди. Аммо у қолишни афзал кўрди. Тодд Боули даврида ҳали "аристократлар" испаниялик ҳимоячидан ташқари ҳеч қайси футболчи билан янги битим имзоламади. Америкалик инвестор фақат янги ўйинчилар сотиб олишни хоҳлайди шеккили, трансферларга 600 миллион евро сарфлади. Лондонликлар АПЛлни 12-ўрин билан якунлади. Ҳа, ўта омадсиз мавсум, лекин энди қилинган хатоларни тўғирлаш вақти келди. "Челси" ушбу ёзда ақлни ишлатиб, керакли позицияларга футболчилар сотиб олшни мақсад қилган. Почеттинонинг ўзи бу ишга бош бўлади. Шу билан бирга, жамоада тозалаш ишлари ҳам бошланган. Моурисио клубга бош мураббий бўлганидан кейин жамоага ким келиб, ким кетишини ўзи ҳал қилишини айтган. У шунчаки майдон четида туриб, раҳбарият танлаган футболчиларга кўрсатма бериш нияти йўқ. Демак, аргентиналик мутаҳассиснинг режаси клубга янги дарвозабон, ярим ҳимоячи ва битта тўпурар олиб келиш.

Дарвоза ва ярим ҳимоя масаласи...

"Челси"нинг икки посбони Эдуард Менди ва Кепа Аррисабалага ёзда жамоани тарк этиши мумкин. "Standart Evening" нашри хабар беришича, Почеттино ҳали биринчи рақамли дарвозабон масаласини ҳал қилмаган. Аммо у янги посбон сотиб олинишини жуда ҳам хоҳлайди. Вариантлар орасида Майк Меньян ва Онана мавжуд. Уларнинг нархи таҳминан 50 миллион фунт бўлиши мумкин. Агарда ёзда янги дарвозабон сотиб олинмаса, келаси мавсумда асосий ўйинларнинг барчасида Кепа бошланғич таркибда майдонга тушади. Умуман олганда, ҳали сўнгги қарор қабул қилинмаган.

"Челси" дарвозабон масаласини ҳал этиши билан биргаликда, ярим ҳимояни ҳам кучайтириши керак бўлади. Айни дам клуб Мойсеc Кайседони сотиб олиш учун ҳаракат қилмоқда. "Брайтон" ярим ҳимоячиси ўтган трансферлар ойнасида ҳам "чайкалар"ни тарк этиши мумкин эди. "Арсенал" қишда 3 марта таклиф билан чиқди, лекин уларнинг барчаси рад қилинди. Эквадорлик футболчи Лондонга йўл олиши аниқлашиб бормоқда. Кайседо учун айни пайт "Челси" ва "Арсенал" ўзаро курашяпти. Агарда ким уни сотиб олишни истаса, "Брайтон" ҳисобига камида 70 миллион фунт ўтказишига тўғри келади.

Деярли ҳал бўлган трансферлар

Сентябр ойида "аристократлар" Кристофер Нкунку билан оғзаки келишувга эришиб олган ва у тиббий кўрикдан ҳам ўтган эди. Қишда эса "Лейпциг" 65 миллион евро эвазига французни сотишга рози бўлди. Бу трансфер расман эълон қилинди. Аввлроқ, Фабрицио Романо "Челси" ФИФА кунларидан кейин французни таништириш маросими бўлишини айтганди. Нкунку бир нечта позицияда ўйнай олади, Почеттино ундан айнан қайси чизиқда фойдаланиши ҳозирча номаълум. Агарда "Челси" ўтган йили Кристофер билан келишиб олмаганида, унга катта харидор "Бавария" бўлар эди, дея хабар берди "Sky Sports" нашри.

Лондон клуби "Вильярреал" ҳужумчиси Николас Жексонни ўз таркибига қўшиб олишга яқин турибди. Сенегаллик футболчи билан шахсий шартлар бўйича келишиб олинган, унинг ўзи ҳам "Челси"да ўйнашни истайди. "Сариқ сув ости кемаси" билан ушбу ҳафта музокаралар ўтказилади. Катта эҳтимол билан Жексоннинг товон пули, яъни 30 миллион фунт тўланади. Николас қишки трансферлар ойнасида "Борнмут"га ўтиши мумкин эди, лекин у тиббий кўрикдан ўта олмади ва мавсумнинг қолган қисмини ҳам "Вильярреал"да ўтказди. Шунингдек, ҳужумчига Англиянинг бир қатор ўртамиёна клубларидан ҳам таклифлар бор эди.

"Челси"га тўпурар керак...

Жексон барибир "Челси"нинг иккинчи рақамли ҳужумчиси бўлиши кутилмоқда. Жамоанинг асосий страйкерига айланиши мумкин бўлган футболчилар бошқа. "Аристократлар" битта эмас, балки бир нечта ҳужумчини кўз остига олиб қўйган. "Ювентус" вакили Душан Влаҳович улар орасида фаворитлардан бири бўлиб турибди. Туринликлар Чампионлар лигасига чиқа олмади. Шундай экан, сербиялик футболчи жамоани тарк этиши мумкин. Бир пайтлар "Арсенал"га ўтмаган Влаҳовичнинг ўйинлари Почеттинога ёқади. Унинг трансфери эса 80 миллион еврога тушиши мумкин. "Челси" А Сериядан ўйинчи олишни ёқтиради шекилли, клуб Лаутаро Мартинесга қизиқмоқда. Энг қизиғи, аргентиналик ҳужумчига ҳам 80 миллион евро талаб қилиниш эҳтимоли бор. "Челси" Интер страйкери учун Реал билан кураш олиб бориши керак бўлади. Мадридликлар айни пайт тўққизликка ўйинчи қидирмоқда. Мазкур икки футболчидан ташқари, Осимҳен ҳам "Челси" радарига тушган.

Суҳроб Холбеков