Родри «Реал» билан шартнома бўйича келишди

«Манчестер Сити» ва Испания терма жамоаси ярим ҳимоячиси Родри Эрнандес бу ёзги трансферлар ойнасидан фойдаланиб жамоасини ўзгартириши ва «Реал Мадрид» сафига ўтиши мумкин.

Италиялик инсайдер ва журналист Николо Скира тарқатган маълумотга кўра, 30 ёшли испаниялик футболчи «қироллик клуби» билан шахсий шартнома борасида келишувга эришган. Янги битим 2030 йил июнигача мўлжалланган.

Хабарга кўра, «Реал» раҳбарияти яқин кунлар ичида Родрининг трансфери юзасидан «Манчестер Сити» билан расмий музокараларни бошлашга тайёр. Шу билан бирга, ярим ҳимоячи «шаҳарликлар» томонидан таклиф этилган шартномани узайтириш вариантидан воз кечгани таъкидланмоқда. Ҳозирги амалдаги келишув 2027 йил июнигача давом этади.

Эслатиб ўтамиз, 2026 йилги жаҳон чемпионатида Родри Испания терма жамоаси таркибида ғолибликни қўлга киритган эди. Мусобақа якунларига кўра, у турнирнинг энг яхши ўйинчиси деб топилган.