Романо «ПСЖ»нинг эҳтимолий янги дарвозабони келажагини қачон муҳокама қилишини айтди

Таниқли футбол инсайдери Фабрицио Романо «Пари Сен-Жермен» клуби томонидан эҳтимолий янги дарвозабон, «Парма» шарафини ҳимоя қилаётган япон футболчиси Дзион Судзуки бўйича маълумот берди.

Романо маълумотига кўра, «Пари Сен-Жермен» Дзион Судзуки трансфери бўйича «Парма» билан келишувга жуда яқин. Кутилмоқдаки, битим умумий қиймати 35 миллион евро атрофида бўлади.

Шу билан бирга, япон дарвозабоннинг кейинги мавсумда қаерда ўйнаши ҳали аниқ эмас. Романо ёзишича, Судзуки трансфердан сўнг «Ювентус» клубига ижарага берилиши ёки «ПСЖ» таркибида қолиши мумкин. Бу, айниқса, Люка Шевалье жамоани тарк этган тақдирда долзарб бўлади. Инсайдерга кўра, ушбу масала бўйича музокаралар келаси ҳафтанинг бошида давом эттирилади.

Эслатиб ўтамиз, Дзион Судзуки 2024 йил ёзида Бельгиянинг «Сент-Трюйден» клубидан «Парма»га 7,5 миллион евро эвазига ўтган эди. Ўтган мавсумда у 22 ўйинда майдонга тушиб, 30 та гол ўтказиб юборди ва олти марта дарвозасини дахлсиз сақлашга муваффақ бўлди. Шуни ҳам қайд этиш керакки, «ПСЖ» таркибида россиялик дарвозабон Матвей Сафонов ҳам тўп сурмоқда.