Ромелу Лукаку «Фенербахче»га ўтишга рози бўлди

«Наполи» ҳужумчиси Ромелу Лукаку «Фенербахче» сафига ўтишга розилик берди. Бу ҳақда инсайдер Маттео Моретто ижтимоий тармоқда хабар берди.

Манбага кўра, 33 ёшли бельгиялик футболчи ва турк клуби ўртасида эҳтимолий трансфер шартлари бўйича тўлиқ келишувга эришилган. Энди навбат «Наполи» ва «Фенербахче» ўртасидаги музокараларга келди.

Хабар қилинишича, «Фенербахче» аллақачон форвард учун илк таклифини йўллаган — тахминан 6 миллион евро атрофида. «Наполи» эса Лукаку учун қарийб 12 миллион евро ишлаб олишни кўзламоқда.

Бельгиялик ҳужумчининг неапол клуби билан амалдаги шартномаси 2027 йил ёзигача мўлжалланган. Аввалроқ Лукаку жамоанинг мавсумолди йиғинларига қўшилмагани, «Наполи» эса уни 10 миллион евро эвазига қўйиб юборишга тайёр экани ҳақида хабарлар тарқалган эди.

Ўтган мавсумда Лукаку «Наполи» таркибида бор-йўғи бешта ўйин ўтказди, бир гол урди ва бир марта сариқ карточка олди.