Роналду - футбол тарихидаги энг яхши тўпурар!

"Манчестер Юнайтед"нинг португалиялик ҳужумчиси Криштиану Роналду футбол тарихидаги энг яхши тўпурарга айланди.

Роналду Англия чемпионатининг 29-туридан ўрин олган "Тоттенхэм"га қарши ўйинда (3:2) хет-трик қайд этди ва фаолиятидаги голлари сони 807 тага етказиб олди. Бу кўрсаткич бўйича у 805 та гол муаллифига айланган чехословакия ва австриялик ҳужумчи Йозеф Бицанни ортда қолдирди.

Эслатиб ўтамиз, Роналду 2021 йилда 760 та гол урганидаёқ энг яхши тўпурар сифатида тан олинган эди, аммо кейинроқ Чехия футбол федерацияси бу рекордни рад этиб, Бицан 821 та гол урганини кўрсатди. Бироқ, ФИФА Бицаннинг роппа-роса 805 та гол урганини тасдиқлади.