Роналду Осиёда туриб Европанинг нуфузли совринини олади

Саудия Арабистони Профессионал лигасида “Ан-наср” шарафини ҳимоя қилаётган Криштиану Роналду УЕФАнинг нуфузли совринини оладиган бўлди.

39 ёшли юлдузга Евррпа Чемпионлар лигаси тарихидаги энг зўр тўпурар соврини топширилади. Бу ҳақда УЕФА ташкилоти матбуот хизмати расман маълумот берди.

Роналду Португалиянинг “Спортинг”, Англиянинг “Манчестер Юнайтед”, Испаниянинг “Реал”, Италиянинг “Ювентус” жамоалари сафида Европа қитъасининг энг нуфузли мусобақаси ҳисобланган Чемпионлар лигасида 183 та учрашувда иштирок этиб, рақиблар дарвозасини 140 маротаба ишғол қилган.

- Криштиану Роналду — Чемпионлар лигасининг энг ёрқин юлдузларидан. Унинг мусобақада тўпурарлик борасида ақлбовар қилмас кўрсаткичларни вақт синовидан ўтди ва янги авлодлар учун мураккаб чақириқ бўлиб қолаверади, - дейилади УЕФА баёнотида.

Криштиану Роналду жаҳон футболида энг кўп гол урган футболчи ҳисобланади.  У ҳозиргача клублар миқёсида 1016 та учрашувда ўз ҳисобига 762 та гол ва 239 та ассист ёздириб қўйган.

Бундан ташқари, Португалия терма жамоасида 212 та беллашувда 130 та тўп киритиб, халқаро миқёсда энг кўп ўйин ўтказиш ва гол уриш бўйича ҳам яққол рекорд ўрнатган.