Роналду ва Месси ўртасидаги асосий жанг авж палласига чиқмоқда! Улардан қай бири футбол тарихидаги энг яхши тўпурарга айланади? (ТОП-10)

Лео Месси карьерасидаги 800-голини Панама термаси дарвозасига киритди. Бу борада аргентиналик даҳо бошқа бир мегаюлдуз Роналдуни таъқиб қилишда давом этмоқда. Хўш, айни дамда бу статистика борасида сайёрамизнинг энг кучли 10 футболчиси кимлар? Кучли бешликда эса чинакам титанлар ўрин эгаллади. Ушбу ўнликни IFFHS нашри мутахассислари тузиб чиққан бўлиб, асосан ишончли фактларга суянади. Шу боис, айрим футболчиларнинг ўрни ўзгарган бўлиши сизни ҳайрон қолдирмасин!

10-ўрин. Жо Бембрик - 616 гол

Шимолий Ирландия вакилини ТОП-10 да бўлишини кутганмидингиз? Тез орада Роберт Левандовски уни ТОП-10 дан суриб чиқариши кутилаяпти. Йигит 1926-1943 йиллар орасида "туманли албион"да жавлон урган. У Ирландия лигасида бир мавсум давомида киритилган голлар сони бўйича "абадий" рекорд (94 гол) эгаси саналади.

9-ўрин. Эйсебио - 619 гол

1957-1978 йиллар оралиғида "қора пантера" 600 дан ортиқ голларни рақиб дарвозасига "михлаш"га улгурди. Барчаси "Бенфика" клуби шарафини ҳимоя қилган йилларига тўғри келади. Терма жамоа сафида эса 64 ўйинда 41 гол. Қаҳрамонимиз карьераси сўнггида АҚШнинг бир нечта клубида омадини синаб кўрди, аммо статистикасини яхшилай олгани йўқ.

8-ўрин. Герд Мюллер - 634 гол

ГФР учун 68 гол киритган йигит "Бавария" шарафини 15 йил давомида муносиб ҳимоя қилди. 13 соврин ва 500 гол! 3 та Европа чемпионлар кубоги! Терма жамоа сафида Европа ва Жаҳон чемпионлиги! Десертга 1970 йилда "Олтин тўп" соврини. Бу статистик маълумотлар катта бир мақоланинг ўрнини бемалол боса олади.

7-ўрин. Жимми Жонстон - 647 гол

Бу йигит ҳақида эшитмаганингиз аниқ. Фаолиятини Шотландия биринчилигида ўтказган форвард "Селтик" клубининг барча замонларидаги энг яхши футболчиси саналади. Қаҳрамонимиз "келтлар" билан 32 совринни боши узра кўтарган. 1967 йилги "Олтин тўп" учун курашда Жимми кучли учликка киришга муваффақ бўлган.

6-ўрин. Йозаф Бицан - 720 гол

Праганинг "Славия" клуби сафида 554 гол уриб, тўпурарлик пойгасига қўшилган йигит кейинчалик Чехиянинг бошқа жамоаларида ҳам муваффақиятли мавсумлар ўтказди. Чехословакия чемпионатида у ўрнатган рекорд (1947 йил, 43 гол) ҳали-ҳамон янгиланмаган. IFFHS нашри томонидан у XX асрнинг энг яхши футболчилари рўйхатида 34-поғонада қайд этилган.

5-ўрин. Ференц Пушкаш - 729 гол

Ўз фаолиятининг барчасини "Гонведе" ва "Реал" Мадрид сафида ўтказган ҳужумчи Венгрияда беш бор мамлакат чемпионлигини қўлга киритган бўлса, Мадридда 10 та совринга эга чиққан. У 4 бор ватанида ва яна шунча Испанияда энг яхши тўпурар учун берилган совринни ўзиники қилиб олган. Қаҳрамонимиз Венгрия терма жамоаси (84 гол) ва "Гонведе" (378) тарихидаги энг яхши тўпурар ҳам саналади.

4-ўрин. Ромарио - 755 гол

Бразилиялик афсона ўзи ўйнаган барча чемпионатларда тенгсиз эканлигини исботлашга муваффақ бўлган. Кариоко лигасида 7 марта, Нидерландия ва Бразилия биринчилигида тўпурарлар пойгасида ҳеч кимга "нон" қолдирмаган йигит Ла Лигада бу ишни бир маротаба уддалаган. 1994 йилда Бразилия билан мундиалда зафар қучгач, мусобақанинг энг яхши футболчиси совринини қўлга киритади. Шунингдек, FIFA томонидан "йилнинг энг яхши футболчиси", деб эътироф этилган.

3-ўрин. Пеле - 762 гол / 1, 283 гол

Пеле Бразилия терма жамоаси сафида 77 бор рақиб дарвозаларини ишғол қилишни уддалаган. Бу статистикада Неймар уни кўп ўтмай қувиб ўтиши эҳтимоли юқори. Уч карра мундиал ғолиби турли-туман рекордлар эгаси саналса-да, уларнинг фактларга асосланмаган эканлиги кўплаб нашрлар томонидан бот-бот эълон қилинмоқда. Масалан, футбол қиролининг киритган голлари сони борасида ҳам аниқ бир далил йўқ. Кимдир 1363 гол деб ҳисобласа, бошқалар 1289 та эканлигини ёзиб қолдирган. Бразилиянинг айрим эски нашрларида эса 19 ёшли Пеле бир мавсумда 126 бор рақиб дарвозасини ишғол қилгани ҳақидаги ҳақиқатдан йироқ маълумотларга кўзимиз тушиши мумкин. Шунга қарамай, IFFHS Пеле урган голлар сонини 726 та деб ҳисоблайди. Демак, шу мезон асосида биз ҳам уни 3-поғонага жойлаштирамиз.

2-ўрин. Лео Месси - 800 гол

Қаҳрамонимиз "Барселона" сафида 672 бор рақиб дарвозаларини ишғол этган. ПСЖ учун 29 гол. Терма сафида эса 99 бор ўз номини таблога ёздириб қўйди. Роналду билан фарқ ўртада улкан эмас, аммо футболчининг азалий рақиби охиригача кураш олиб бориши аниқ. Боз устига, Саудия Арабистони чемпионатида ўзини яхши ҳис қилаётган португалиялик юлдуз 40 ёшга қадар тўп тепмоқчи эканлигини яшириб ўтирмаяпти. "Титанлар тўқнашуви"да сўнгги сўзни ким айтиши жуда ва жуда қизиқ.

1-ўрин. Криштиану Роналду - 830 гол

Лео эндигина 800лик довонни ошиб ўтди. Роналду бу вазифани 2021 йилнинг декабр ойида "Арсенал" дарвозасига икки гол киритиб уддалаган эди. Шунингдек, Роналду терма жамоа сафида киритилган голлар бобида ҳам сайёрамизнинг энг кучли (122 гол) ижрочиси саналади.

Шунингдек, ЕЧЛда урилган голлар сони (140) бобида ҳам ҳеч ким унинг олдига туша олмайди. Қаҳрамонимизнинг максималист эканлигини ҳисобга олсак, бу рақамлар йиллар давомида катта тезлик билан ўсиб боришига шубҳа йўқ. Рақиби ўзидан 2 ёш кичик экани ва унда вақт бироз кўпроқ бўлишини ҳисобга олган форвард ўртадаги фарқни катталаштириш учун қўлидан келган барча ишни қилади. 

P.s Сизнингча, "ўзга сайёралик" йигитларнинг сўнгги курашида кимнинг қўли баланд келади?