Роналду ва Мессининг гегемонлигига Федерер барҳам берди

Forbes маълумотларига кўра, дунёдаги энг кўп маош оладиган спортчилар даромадлари сўнгги тўрт йилда биринчи марта тушди. Бу Covid-19 пандемиясининг бошланиши билан боғлиқ, чунки Иккинчи жаҳон урушидан бери биринчи марта кўплаб муҳим спорт тадбирлари бекор қилинди ёки қолдирилди.

Дунёнинг энг кўп маош оладиган 100 нафар спортчиси бу йил умумий ҳисобда 3,6 миллиард доллар ишлаб топди. Бу эса ўтган йилгига нисбатан 9 фоизга кам. Рейтинг иштирокчиларининг даромадлари 2016 йилдан бери биринчи марта камайди. Аммо ўша йили қулаш фақатгина ўтган йилги "юқори база" туфайли содир бўлган эди, боксчилар Флойд Мейвезер ва Мэнни Пакьяо ўртасидаги "аср жанги"дан кейин боксчилар 400 миллион доллар ишлаб топди ва шу тариқа, жаҳон спорти элитасининг умумий даромади кўтарилиб кетди.

Тарихда биринчи марта теннисчи Рожер Федерер рейтингнинг энг юқори поғонасида эътироф этилди. Швейцариялик теннисчи охирги 12 ой ичида солиқлар билан қўшиб ҳисоблаганда жами 106 миллион доллар ишлаб топди. Шу тариқа, у сўнгги тўрт йилдан буён рейтингнинг биринчи поғонасини навбатма-навбат  ҳеч кимга бермай келаётган Криштиану Роналду ва Лионель Мессини ортда қолдирди. Сўнгги 12 ой ичида жаҳон футболининг икки афсонаси жами 209 миллион доллар даромад олди. Бу уларнинг 2019 йилги даромадларига нисбатан 28 миллион долларга кам деганидир. Бунга Европанинг кўплаб клубларида 2020 йил март ойидан мавсумининг тўхтатилиши сабаб, маошларнинг пасайтирилгани сабаб бўлган.

Яна бир аҳамиятли жиҳат, Рожер Федерер Forbes 1990 йилдан бери эълон қилиб келинаётган дунёдаги энг кўп маош олувчи спортчилар рейтингида биринчи ўринни эгаллаган тарихдаги 9-спортчига айланди. Шунингдек, у ушбу рейтингда 1-ўринда қайд этилган илк теннисчи бўлди. Рожер Федерер сўнгги бир йил ичида кортдан ташқарида Uniqlo, Credit Suisse, Mercedes-Benz ва бошқа 10 га яқин компаниялар билан ҳомийлик шартномалари имзолаш орқали 100 миллион доллар ишлаб топди. Бошқа бирон бир спортчи бу қадар катта ҳомийлик шартномасига эга эмас. Криштиану Роналду Nike, Altice, Herbalife ва ўзининг CR7 брендидан 42 млн доллар ишлаб топган бўлса, Adidas, MasterCard ва PepsiCo компаниялари билан ҳамкорлик қилиш ортидан Лионель Месси 32 млн доллар даромад олди.

Forbes маълумотларига кўра, дунёдаги энг кўп маош оладиган спортчилар рейтингига 21 мамлакат спортчилари киритилган. Рейтинг иштирокчилари спортнинг 10 тури бўйича фаолият кўрсатади. 2016 йилдан бери биринчи марта рейтингга иккита аёл спортчи киритилди. Булар теннисчилар Наоми Осака ва Серена Уильямсдир. 2016 йилда дунёнинг энг кўп маош оладиган аёл спортчилари рейтингида Серена Уильямсдан ташқари россиялик теннисчи Мария Шарапова ҳам кирганди. Наоми Осака турнирдаги ғалабалардан 3,4 миллион доллар, Nike, Nissan Motor и Procter & Gamble компаниялари билан ҳамкорлик ортидан 34 миллион доллар ишлаб топди ва у жаҳон спорти тарихидаги энг кўп даромад олувчи спортчи аёлга айланди. Шу кунгача дунёнинг энг кўп маош оладиган спортчилар рейтингига аёллар орасида фақатгина теннисчилар кирган холос. Бошқа спорт турлари билан шуғулланадиган аёллар ҳеч қачон бу номга эриша олмаган.

Forbes спортчиларнинг даромадларини аниқлашда уларнинг турнирларда қўлга киритган мукофот пуллари, профессионал шартномалар бўйича иш ҳақи ва олинган қўшимча бонусларни инобатга олади.