Ronaldu va Messining gegemonligiga Federer barham berdi

Forbes ma’lumotlariga ko‘ra, dunyodagi eng ko‘p maosh oladigan sportchilar daromadlari so‘nggi to‘rt yilda birinchi marta tushdi. Bu Covid-19 pandemiyasining boshlanishi bilan bog‘liq, chunki Ikkinchi jahon urushidan beri birinchi marta ko‘plab muhim sport tadbirlari bekor qilindi yoki qoldirildi.

Dunyoning eng ko‘p maosh oladigan 100 nafar sportchisi bu yil umumiy hisobda 3,6 milliard dollar ishlab topdi. Bu esa o‘tgan yilgiga nisbatan 9 foizga kam. Reyting ishtirokchilarining daromadlari 2016 yildan beri birinchi marta kamaydi. Ammo o‘sha yili qulash faqatgina o‘tgan yilgi "yuqori baza" tufayli sodir bo‘lgan edi, bokschilar Floyd Meyvezer va Menni Pakyao o‘rtasidagi "asr jangi"dan keyin bokschilar 400 million dollar ishlab topdi va shu tariqa, jahon sporti elitasining umumiy daromadi ko‘tarilib ketdi.

Tarixda birinchi marta tennischi Rojer Federer reytingning eng yuqori pog‘onasida e’tirof etildi. Shveytsariyalik tennischi oxirgi 12 oy ichida soliqlar bilan qo‘shib hisoblaganda jami 106 million dollar ishlab topdi. Shu tariqa, u so‘nggi to‘rt yildan buyon reytingning birinchi pog‘onasini navbatma-navbat  hech kimga bermay kelayotgan Krishtianu Ronaldu va Lionel Messini ortda qoldirdi. So‘nggi 12 oy ichida jahon futbolining ikki afsonasi jami 209 million dollar daromad oldi. Bu ularning 2019 yilgi daromadlariga nisbatan 28 million dollarga kam deganidir. Bunga Evropaning ko‘plab klublarida 2020 yil mart oyidan mavsumining to‘xtatilishi sabab, maoshlarning pasaytirilgani sabab bo‘lgan.

Yana bir ahamiyatli jihat, Rojer Federer Forbes 1990 yildan beri e’lon qilib kelinayotgan dunyodagi eng ko‘p maosh oluvchi sportchilar reytingida birinchi o‘rinni egallagan tarixdagi 9-sportchiga aylandi. Shuningdek, u ushbu reytingda 1-o‘rinda qayd etilgan ilk tennischi bo‘ldi. Rojer Federer so‘nggi bir yil ichida kortdan tashqarida Uniqlo, Credit Suisse, Mercedes-Benz va boshqa 10 ga yaqin kompaniyalar bilan homiylik shartnomalari imzolash orqali 100 million dollar ishlab topdi. Boshqa biron bir sportchi bu qadar katta homiylik shartnomasiga ega emas. Krishtianu Ronaldu Nike, Altice, Herbalife va o‘zining CR7 brendidan 42 mln dollar ishlab topgan bo‘lsa, Adidas, MasterCard va PepsiCo kompaniyalari bilan hamkorlik qilish ortidan Lionel Messi 32 mln dollar daromad oldi.

Forbes ma’lumotlariga ko‘ra, dunyodagi eng ko‘p maosh oladigan sportchilar reytingiga 21 mamlakat sportchilari kiritilgan. Reyting ishtirokchilari sportning 10 turi bo‘yicha faoliyat ko‘rsatadi. 2016 yildan beri birinchi marta reytingga ikkita ayol sportchi kiritildi. Bular tennischilar Naomi Osaka va Serena Uilyamsdir. 2016 yilda dunyoning eng ko‘p maosh oladigan ayol sportchilari reytingida Serena Uilyamsdan tashqari rossiyalik tennischi Mariya Sharapova ham kirgandi. Naomi Osaka turnirdagi g‘alabalardan 3,4 million dollar, Nike, Nissan Motor i Procter & Gamble kompaniyalari bilan hamkorlik ortidan 34 million dollar ishlab topdi va u jahon sporti tarixidagi eng ko‘p daromad oluvchi sportchi ayolga aylandi. Shu kungacha dunyoning eng ko‘p maosh oladigan sportchilar reytingiga ayollar orasida faqatgina tennischilar kirgan xolos. Boshqa sport turlari bilan shug‘ullanadigan ayollar hech qachon bu nomga erisha olmagan.

Forbes sportchilarning daromadlarini aniqlashda ularning turnirlarda qo‘lga kiritgan mukofot pullari, professional shartnomalar bo‘yicha ish haqi va olingan qo‘shimcha bonuslarni inobatga oladi.