Роналду зўрми ёки Месси? Касильяс жавоб берди

“Реал” ва Испания терма жамоасининг собиқ дарвозабони Икер Касильяс замонамизнинг энг кучли икки футболчиси Лионель Месси ва Криштиану Роналдуни солиштирди.

- Криштиануда болалигидан ҳар доим энг яхши бўлиш истаги бўлган. У мақсадига етди. Агар уни Месси билан солиштирсак, натижалари Леоникидан яхши эканини тан олиш керак. Мессининг катта истеъдод соҳиби эканини ҳаммамиз биламиз, Роналду эса энг зўр футболчи бўлиш учун узоқ ва кўп меҳнат қилди.

Икки буюк футболчининг рақобатини кўриш барчамиз учун омад. Роналдуни яқиндан танимаганларга у такаббур бўлиб кўриниши мумкин, лекин аслида ундай эмас, - деди Касильяс.

Касильяс мадридликлар сафида тўп сурган бўлса-да, каталонияликлар етакчиси Лионель Месси билан дўстона алоқаларни сақлаб қолган. Улар бир бирини қаттиқ ҳурмат қилишини кўп бор таъкидлаган. 

Касильяс 1998-2015 йиллар давомида “Реал” дарвозасини қўриқлаган ва кейинчалик “Порту”га ўтиб кетган эди. Испания тарихидаги энг зўр дарвозабонлардан бири сифатида эътироф этилган Икер фаолиятини якунлаганини 4 август куни эълон қилди.