Рўзиқул Бердиев: "Ўйлайманки, Игорь бундай хатоларни бошқа қилмайди"

Суперлиганинг 4-туридан ўрин олган “Шўртан” – “Насаф” (1:4) учрашувидан кейин қаршиликлар бош мураббийи Рўзиқул Бердиев матбуот анжуманида қатнашди.

- Мухлисларимизни бугунги ғалаба билан табриклаймиз. Рақибнинг хатосини кутдик, бунга мажбур қилдик. Хатоларидан унумли фойдаландик. Ўйиндаги вазифамизни анча енгиллаштирдик. Учрашувни тўлиқ назорат қилдик. Фақатгина иккинчи бўлимни 15-20 дақиқаси давомида бироз тўп ва ўйин назорати бўйича рақибга имкон бердик. Қолган барча дақиқаларда ўйинни назорат қилдик.

- Алибек Давронов, Ғолиб Ғайбуллаев, Шуҳрат Муҳаммадиевни асосий таркибга киритилмаслиги тактика билан боғлиқми ёки жамоанинг даражасидан келиб чиқиб тактика ўзгарганми?

- Жамоага ёрдам беришга тайёр бўлиб турган кўп футболчиларимиз бор. Ўтган учрашувда Шуҳрат билан Ғолибдан фойдалангандик. Бугун Умар тикланиб бўлганидан кейин у билан бирга Игорга имконият бердик. Ўз вазифаларини яхши бажаришди. Шерзод йўқлиги учун Шароф чап қанотда ҳаракат қиляпти. Ҳозир менимча, Зафар энг яхши ҳолатида. Кўряпсизлар, жуда фаол ҳаракат қиляпти. Кўп эмас, учта позицияда ўзгариш қилдик. Менимча, учрашувларда ўйинчиларга имконият бериш учун ротация қилиб туришимиз керак. Улар ҳар қандай ҳолатда ўйин амалиётига эга бўлиб туриши лозим. Кенжабоев билан Давроновни умумий гуруҳга жалб қилиб боряпмиз. Яқин орада функционал ҳолати яхшиланиб боради.

- Насруллаевни жароҳати қандай?

- У бизнинг назоратимизда. Ҳозирда алоҳида машғулотларда қатнашяпти. Кеча ўзи билан суҳбатлашганимда ҳолати яхшиланиб бораётганини айтди. Ўйлайманки, тезроқ сафимизга қайтади.

- Игорь Голбанни пенальтига сабаб бўлган ҳаракатини қандай қабул қилдингиз ва бу ҳақида фикрингиз?

- Бу вазиятга олиб келмаслиги керак эди. Албатта, такрорий ҳолатни кўриб янада хулоса чиқаришимиз мумкин. 3:0 ҳисобида рақибга бундай имконият бериб, вазиятни оғирлаштириб қўйиш менимча тажрибали ўйинчи учун нотўғри. Бу вазиятда Игорга танбеҳ бердим. Чунки 3:0 бўлиб турганида жамоа баъзида бўшашиши ва салбий оқибатларга олиб келиши мумкин. Ўйлайманки, Игорь бундай хатоларни бошқа қилмайди.