“Насаф”нинг бош мураббийи Рўзиқул Бердиев сирқирра ижодкор. У қийинчиликларга қарамай, маҳаллий ёшлар билан ҳам қандай жамоа шакллантирганини ҳамма кўриб турибди. Шу боис ҳам уни барча ҳурмат қилади ва мураббийлик салоҳиятига катта ишонч билан қарайдилар.

Бу йил ҳам унинг жамоаси совринли ўринларга даъвогарлик қилмоқда. Футболни эса ўз билими даражасида теран тушунади. Sports.uz мухбири билан суҳбатда бир қатор масалаларда фикр билдирди. Аввало гапни терма жамоа ҳақида бошлади.

-  Менимча, иккала жамоа ҳам бу ўртоқлик ўйини бўлгани учун жиддий ёндашишмади, - дея суҳбатни бошлади Бердиев. - Чунки уларнинг ҳам, бизнинг ҳам таркибимиз тўлиқ эмасди. Эрон натижа учун ҳар доим шундай ўйнаган. Яна тартибли ўйини билан ғалабага эришди. Эронда ҳар бир мураббий даврида тартибли ўйин орқали натижани қўлга киритиш вазифаси бўлиб келган. Тўғри, терма жамоамизни ҳам ёмон ўйнади, деб бўлмайди. Мураббийларимиз янги ўйинчиларни ҳам синаб кўришмоқда. Ким қанчалик тайёргарликка эгалиги мураббийларга аён.

-  Ҳужумчимиз Элдор Шомуродовнинг Италия А сериясига кетгани муҳим воқелик сифатида қаралмоқда. Сизнингча, уни Италияда нима кутяпти, деб ўйлайсиз?

-  Бир нарсани аниқ айтишим керак, бу футболимиз учун катта ютуқ бўлди. Европанинг кучли бешлик чемпионатларидан бирида ўзбекистонлик ўйинчининг тўп суриши халқимизни хурсанд қилади. Чиндан ҳам бунга катта воқеа сифатида қараш лозим. Элдор Россияда ўйнаганида ҳам футболчиларимиз ва футболимизнинг юзини кўрсатиб берди. Унинг имкониятларини яхши биламиз. Шомуродовда Италияда ҳам ўзини кўрсатиш учун барча хусусиятлари бор. Гол уришни ҳам, жамоа учун ўйнашни ҳам билади. Фақат янги муҳитга тезроқ мослашиши керак. Мураббийнинг ишончи ва жамоанинг қанчалик қабул қилиши жуда муҳим саналади.

-  Сиз бошқараётган “Насаф”да ҳам иқтидорли футболчилар жуда кўп. Шомуродов сингари улардан қайсилари кейинчалик Европага тортади, деб айта оласиз?

-  Ҳозирги йигитларимиз ҳам ўсишга эришяпти. Ҳозирча бу ҳолат фақат Ўзбекистон даражасида бўлиб қоляпти. Аммо жамоамиздан олдин кетган ўйинчиларни ҳам кўрдинглар, улар ҳар қандай жамоанинг ўйинини кучайтиришга имконияти катталигини кўрсатишди. Масалан, Одил Ҳамробеков “Пахтакор”да яхши ўйнаяпти. Азиз Ғаниевни қаранг! Осиё Чемпионлар лигасидек жиддий мусобақада ҳам у жамоасининг етакчиларидан бирига айланиб бўлган. Ҳозирги ёшларимизнинг ичида ҳам келажакда кўп нарсага эриша оладиганлари бор. Элдорга ўхшаб Европада тўп суришларини жуда истаймиз. Лекин бу кўпроқ ўзларига ҳам боғлиқ. Футболда агентлар ҳам яхши ишлаши керак бўлади. Россияда ўйинчиларимиз ўзларини яхши кўрсатишяпти. Бу эса футболимизнинг даражасини кўрсатиб беряпти. Ўйлашимча, ўзбек футболига бўлган эътибор хорижда янада кучаяди.

-  Лекин аксарият ўйинчиларимиз асосан Осиёга қараб кетишяпти. Европада эса...Нима учун ўзбек футболчилари араб ёки Осиёнинг бошқа чемпионатларига кетишяпти. Бунинг асосий сабаби пулми ёки агентлар билан боғлиқми? Ваҳоланки, Европада кўпроқ легионерларимиз ўйнашини истаймиз. Бу эса футболимизнинг ўсишига янада жиддий туртки бериши шубҳасиз...

-  Бунга асосий сабаб шу пайтгача Европадан бизнинг футболчиларимизга эҳтиёж бўлмаган. Араблардан бўладиган таклифлар эса клуб ва ўйинчи учун маъқул келаётгани боис кўпроқ ўша томонларни танлашяпти. Четдан таклиф бўлганида бу клубга ҳам, футболчига ҳам ҳар тарафлама маъқул келиши керак. Элдор Шомуродов, Остон Ўрунов, Жасур Жалолиддинов каби легионерларимиз орқали ўзбекистонлик ўйинчиларга эътибор янада кучаяди.

-  Шунингдек, ўзбекистонлик мураббийларнинг хизматига ҳам хорижда талаб катта эмас. Бабаян Хитойда ишлаётганди, аммо у ҳам кетди. Фикрингизча, нима учун ўзбек мутахассислари хорижга талпинишмаяпти? Ёки агентлар билан ишлаш масаласи яхши йўлга қўйилмаганми?

-  Балки агент тарафи ҳам бордир. Масалан, Хитойни оладиган бўлсак, у ердаги клублар жуда бой. Шунга яраша салоҳияти баланд, номи чиққан мураббий ёки футболчиларни чақиришни маъқул кўришади. Бизнинг мураббийларимиз эса ҳали шу пайтга қадар ҳеч қаерда номи чиқмаган ва бирор нимага эришмаган ҳам. Тан олишимиз керак, бизнинг мураббийларга деярли эътибор йўқ десак ҳам бўлади. Мураббийнинг иши футболчиникига ўхшаш. Агар четда бирор-бир мутахассисимиз катта натижаларга эришганида бошқаларга ҳам балки йўл очиларди. Қолаверса, бизнинг мураббийлик лицензияларимиз хорижда ишлашга имкон бермайди.

-  Лекин сизга Эроннинг “Тракторсози” жамоасидан таклиф бўлганди...

-  Осиё Чемпионлар лигасида “Тракторсози”ни икки марта ютганимиздан сўнг қизиқиб қолишганди. Ўшанда клуб бош мураббийлигига учта номзод бўлган ва уларнинг орасида мени ҳам номим бўлган. Ушбу ҳақида Эрон матбуоти ёзганидан кейин бу гап чиқди.

-  Ўзингизда ҳам хорижда ишлаш хоҳишингиз борми? Ёки бутун эътиборингизни фақат “Насаф”га қаратганмисиз?

-  Ҳозирча “Насаф”да. Нима бўлишини вақт кўрсатади. Агар хориждан яхшироқ вариант бўлса, нимага ишламаслигимиз керак? Фақат бизнинг чемпионатимиздан юқори бўлиши керак. Клубнинг даражаси ҳам баланд бўлмоғи зарур.

-  Менимча, бу борада имконият юқорироқ. Чунки мураббий сифатида эришган ютуқларингиз бисёр. Лекин биргина чемпионлик етишмаяпти...

-  Андижондаги учрашувдан кейин айтгандим, 2018 йили раҳбариятга катта мақсад қўйиш кераклиги ҳақида маълум қилгандик. Ўшанда жамоамиз чемпионлик даражасига яқин келганди. Афсуски, кўплаб етакчиларимиз жамоамизни тарк этишди. Билсангиз, ўша кезларда икки йилча таркибимизни сақлаб келгандик. Жамоамизнинг имкониятларини юқори чўққисига чиқаргандик. Ҳозир ҳам жамоамизни ўтган вақт давомида анча сайқалладик десак ҳам бўлади. Лекин кейинги йилга нима бўлишини вақт кўрсатади.

-  Яқинда вилоят ҳокими билан учрашгандинглар. Ўша учрашувдан кўнглингиз тўлдими?

-  Вилоятнинг биринчи одами жамоага эътибор қаратар экан, бу сизни ҳар тарафлама қувонтиради. Ҳар қандай масала ечилишига ишонасиз.

-  Муҳими, ёш жамоа билан яна юқори ўринлар учун кураша олишингизни кўрсатяпсиз. Мавсум якунигача  нима кутяпсиз?

-  Йилнинг бошидаги таркибимизни ва сафимиздан кетган ўйинчиларни кўриб, бизни бу даражага чиқишимизга кўпчилик ишонмаганди. Ҳаттоки, “Насаф”ни кучли олтиликда ҳам кўришга ишонмаётганлар бор эди. Биз эса жамоа ўйинини шакллантиришга ва йигитларни ишонтиришга ҳаракат қилдик. Ўйлайманки, бунинг уддасидан чиқяпмиз. Лекин ҳали ҳеч қанақа вазифани уддалаганимиз йўқ. Чунки ҳали мавсум давом этяпти. Жамоамизнинг ўйинига тўғри баҳо берадиган бўлсак, чиндан ҳам “Насаф” совринлар учун курашишга ҳақли.

-  Бундан ташқари, жамоангиз ўйинини ва шогирдларингизни скаутлар ҳам кузатаётган бўлса керак, ҳаммаси бир-бирига боғлиқ...

-  Ҳар йили қайсидир етакчиларимиз кетишяпти. Ёки трансфер қиляпмиз. Жамоамизнинг ҳозирги ўйинларидан кейин яна қизиқишлар бўлиши табиий.

-  Футболчиларингизга расман таклифлар тушяптими?

-  Билмадим, балки клубга чиқишгандир. Трансферлар бўйича клуб билан гаплашишади, мураббийларга алоқага чиқишмайди. Эшитишимча, таклифлар бор, ўйинчиларимизга.

-  Хорижданми?

-  Бу хусусида аниқ бир нарса дея олмайман.